ምርጫ ቦርድ የአስቂኙን ምርጫ ውጤት ይፋ አደረገ * ኢሕአዴግ 100% አሸነፈ አለ * ምንም አይነት ተቃዋሚ ፓርቲ የፓርላማ ወንበር አላገኘም

(ዘ-ሐበሻ) ኢህአዴግ እና አጋር ድርጅቶቹ የዘንድሮውን አሳፋሪ ምርጫ 100% ማሸነፋቸውን ምርጫ ቦርድ ይፋ ባደረገው ሪፖርት ገለጸ:: ምንም አይነት ተቃዋሚ ፓርቲ በፓርላማው ውስጥ መቀመጫ እንዳላገኘም ተገልጹዋል::
election board
የገዢው ፓርቲ መሳሪያና ገለልተኛ ያልሆነው ምርጫ ቦርድ ይፋ ባደረገው ሪፖርት ኢህአዴግ አዲስ አበባ ላይ ከ23 መቀመጫዎች ኢህአዴግ 23ቱንም መቀመጫዎች አግኝቷል።
– ከትግራይ ክልል ቦርዱ ከደረሱት የ31 መቀመጫዎች ውጤት ህውሃት/ኢህአዴግ 31 መቀመጫዎችን
– ከአማራ ክልል ከደረሱት የ107 መቀመጫዎች ውጤት ብአዴን/ኢህአዴግ 107 መቀመጫዎች
ከኦሮሚያ ክልል ቦርዱ ከደረሱት የ150 መቀመጫዎች ውጤት ኦህዴድ/ኢህአዴግ 150 መቀመጫዎችን
– በኢትዮጵያ ሶማሊ ክልል ቦርዱ ከደረሱት የ16 መቀመጫዎች ውጤት ኢሶዴፓ 16 መቀመጫዎችን
– ከቤንሻንጉል ጉሙዝ ክልል ከደረሱት የሰባት መቀመጫዎች ውጤት ሰባቱንም ቤጉዴፓ;
– ከደቡብ ክልል ከደረሱት የ95 መቀመጫዎች ውጤት ዴኢህዴን/ኢህአዴግ 95 መቀመጫዎች፣
– በጋምቤላ ክልል ጋህዴፓ ከሶስት መቀመጫዎች ሶስቱንም፣ በሀረሪ ክልል ሀብሊ ከ2 መቀመጫዎች አንዱን ሲያገኝ አንዱን ኦህዴድ/ኢህአዴግ፣
– በድሬዳዋ ከተማ አስተዳደር ከሁለቱ መቀመጫዎች አንዱን ኦህዴድ/ኢህአዴግ ቀሪውን ሶህዴፓ አግኝተዋል
– ከአፋር ክልል ከደረሰው ከደረሰው የስድስት መቀመጫዎች ውጤት አብዴፓ ስድስቱንም መቀመጫ አግኝቷል።

በአሳፋሪነቱ የሚጠቀሰው የዘንድሮውን ምርጫ የአውሮፓ ሕብረት; የአሜሪካ መንግስትና ሌሎች ዓለም አቀፍ ድርጅቶች ፍትሃዊ ያልሆነ ምርጫ ሲሉ አውግዘውታ:: ተቃዋሚዎችም የምርጫውን ውጤት እንደማይቀበሉት አስታውቀዋል::

– See more at: http://www.zehabesha.com/amharic/archives/41775#sthash.MJsCLsKz.dpuf

ውዝግብን ያስተናገደው የዛሬው የጦማሪያኑ እና የጋዜጠኞቹ የፍርድ ቤት ዝርዝር ዘገባ (ኤልያስ ገብሩ)

በትናንቱ የቪኦኤ ዘገባ ላይ አቃቤ ሕግ ቅሬታ አቀረበ
ጦማሪ አቤል ዋበላ ችሎት በመድፈር ወንጀል ጥፋተኛ ተባለ
‹‹ሥነ-ሥርዓት ያዝ!›› ዳኞች
‹‹እናንተ ራሳችሁ ሥነ-ሥርዓት ያዙ! ይህ ችሎት ነው፡፡ ግልጽ ነው›› አቤል ዋበላ
‹‹ውሳኔው ለሁሉም ከሆነ፣ ለአቃቤ ህጉም ሆነ ለአለቃው ጠ/ሚኒስቴርም መሆን አለበት፡፡››
‹‹ጓደኛዬ (አቤል) የሚቀጣ ከሆነ ውሳኔው እኔም ላይ ይታዘዝ››
ጦማሪ ናትናኤል ፈለቀElias Gibru

ትናንት ምሽት ከ3፡00 ሰዓት ጀምሮ የአሜሪካ ድምጽ ሬድዮ (VoA)ን ሳዳምጥ ነበር፡፡ ከዘገባዎቹ መካከል ከአንድ ዓመት በላይ በእስር ላይ ስለሚገኙት ስድስቱ የዞን 9 ጦማሪያንና ሶስት ጋዜጠኞች በትናንትናው ዕለት በፌዴራል ከፍተኛ ፍርድ ቤት 19ኛ ወንጀል ችሎት የነበራቸውን የፍርድ ቤት ውሎ ይገኝበታል፡፡ ዘጋቢው ጋዜጠኛ መለስካቸው አምሃ ጠበቃ አምሃ መኮንን በስልክ በማነጋገር የፍርድ ቤት ውሎውን አስደምጦን ለዛሬ በአዳሪ የተቀጠረ ጉዳይ መኖሩን ስሳማ ጠዋት ወደችሎት ላመራ ወሰንኩ፡፡ በችሎቱ ዛሬ በጥዋት ልደታ ፍርድ ቤት ደረስኩ፡፡ በችሎቱ በር አቅራቢያ ጋዜጠኛ በላይ ማናዬ፣ የአማሪካ ኤምባሲው ባልደረባ በላይ ለገሠና ሌሎች ጥቂት የውጭ ሀገር ዘጋቢዎች እና ዲፕሎማቶች ነበሩ፡፡ ከርቀት አብዲ ለሜሳንና ጓደኞቹን ሰላም አልኳቸው፡፡ ከነበላይ ጋር ስለሰሞኑ ምርጫ አወጋን፡፡ ትንሽ ቆይቶ የቪኦኤው ዘጋቢ መለስካሰካቸው አምሃም መጣ፡፡ ስለትናንቱ የዜና ዘገባው፣ ስለምርጫው ሁኔታ … ጥቂት አወጋን፡፡

ከ3፡50 ገደማ ጦማሪያኑና ጋዜጠኞቹ ወደ ችሎቱ በፖሊሶች ታጅበው መጡ፡፡ [ጋዜጠኛ ተስፋለም ወደፍርድ ቤት ይዟቸው በመጣው የእስረኛ መኪና ውስጥ ሆኖ እጁን ለሰላምታ ሲያውለበልብ እኔና እና በላይ አይተነው ነበር፤ ላለፉት ዓመታት ከተስፍሽ ጋር ለፍርድ ቤት ዘገባ ነበር ልደታ የምንገኛኘው፡፡ አንዳንዴም አብረን ከቤት የምንወጣበት ጊዜም ነበር፡፡ ዛሬ እሱ ታሳሪ እኔ ደግሞ ዘጋቢ ሆኜ የሚመጣውን እያየን እንገናናለን፤ ይሄ ሀሳብ አዕምሮዬ ተመላለሰ – ውስጤ እንዳዘነ!] ሰላምታ ሰጥተናቸው ገቡ፡፡ እኛም እየተፈተሽን ወደችሎቱ ዘለቅን፡፡ ሁሉም ቦታ ቦታውን ያዘ፡፡ አቀማመጣቸውም ከፊት አስማማው ሃ/ጊዮርጊስ፣ ኤዶም ካሳዬ፣ ናትናኤል ፈለቀና ማህሌት ፋንታሁን ሲሆኑ፣ በመጨረሻው የእስረኞች ወንበር ላይ ደግሞ አቤል ዋበላ፣ ዘላለም ክብረት፣ በፍቃዱ ኃይሉ፣ አጥናፍ ብርሃኔና ተስፋለም ወልደየስ ተቀምጠው ነበር፡፡ ከረፋዱ 4፡10 ሰዓት ላይ የችሎቱ ዳኞች ተሰየሙና ‹‹እነሶሊያና ሽመልስ …›› በሚል የዕለቱ ችሎት ስራውን ጀመረ፡፡

የችሎቱ የቀኝ ዳኛ ጉዳዩ ለዛሬ ያደረበትን ጉዳይ ከገለጹ በኋላ ውሳኔ ማንበብ ጀመሩ፡፡ አቃቤ ሕግ ተጨማሪ ምስክሮች እንዲሰሙለት የጠየቀው ነገር ‹‹የደረጃ ምስክሮቹ በሥራ ምክንያት ስላላገኘናቸው›› ሲል ያቀረበው ሀሳብ ‹‹ሥለስራቸው በግልጽ አልተገነገረም››ና ፍርድ ቤቱ የአቃቤ ህግን ጥያቄ ሳይቀበል ቀርቶ ውድቅ ማድረጉን ገለጸ፡፡

‹‹የሚቀሩ ሲዲዎች አሉኝ›› በማለት አቃቤ ህግ በድጋሚ ያቀረበውን ጥያቄም ፍርድ ቤቱ ውድቅ አድርጎ በ1ኛ ተከሳሽ ላይ አቃቤ ሕግ አቀርበዋለሁ የሚለው ሲዲ እንዲቀርብ ሲል ውሳኔ ሰጠ፡፡ ፍርድ ቤቱ ሲዲውን ከሰዓት በኋላ ማቅረብ ይችል እንደሆነም አቃቤ ህጉን ብርሃኑ ወንድማገኝን ጠይቆት ነበር፡፡ [ከቦታው ርቀት ከድምጹ ማነስ አኳያ የአቃቤ ህጉን መልስ ማድመጥ አልቻልኩም] ፍርድ ቤቱም ‹‹ሲዲው በጽ/ቤት በኩል ይግባና ዳኞች ካየነው በኋላ ‹ሲዲው በግልጽ ቢታይ ችግር አለው ወይስ የለውም? ቀሪ ተከሳሾችን ይጎዳል አይስ አይጎዳም?› የሚለውን አይቶ ውሳኔ ለመስጠት ለሰኔ 09 ቀን ቀጠሮ እንያዝ›› ብሎ ነበር፡፡

አቃቤ ሕጉ አቶ ብርሃኑ ወንድማገኝም ቅሬታ አለኝ በማለት ለችሎት ተናግረዋል፡፡ ሀሳብን በሚዲያ በመግለጽ በኩል ችግር መኖሩን ጠቁመው፤ ‹‹በትናንትናው ዕለት በቪኦኤ በቀረበው የፍርድ ቤት ዘገባ ላይ በጠበቃ አምሃ በኩል የቀረበው አስተያየት ሚዛናዊ ያልሆነና አንድ አካል ላይ ተጽዕኖ የሚፈጥር ነው፡፡ የዘገባው አቀራረብ ትክክል አይደለም፡፡ በአንድ ወገን የቀረበ ነው፡፡ እንዲህ መዘገብ የለበትም፡፡ በአግባቡ ይዘገብ፡፡ በፍርድ ቤት ዘገባ ላይ ላይም ሥርዓት ይደረግ›› የሚል ይዘት ያለው አቤቱታ አቅርበዋል፡፡

ጠበቃ አምሃም ‹‹አቃቤ ሕጉ በዚህ መድረክ ላይ አንድ ተከራካሪ ናቸው፡፡ ሥርዓት የማስያዝ መብት የላቸውም፡፡ ዘገባው ችግር አለበት ካሉ ‹‹በምን ቀን የትኛው ጉዳይ ስህተት እንደሆነ በግልጽ ለፍርድ ቤቱ አቅርበው ይታረምልኝ ማለት ይችላሉ፡፡ ነገር ግን የችሎቱን ሥራ እንደሚመራ መሆን አይገባም፡፡ ትክክል አይደለም፡፡ እዚህ ችሎት ውስጥ ብዙ ጋዜጠኞች እና ይመለከተናል የሚሉ ወገኖች አሉ፡፡ ጉዳዩ በተለያየ መንገድ ይዘገባል፡፡ የችሎት ጉዳይ እንዴት እንደሚዘገብ እናውቃለን፡፡›› በማለት መልስ ሰጡ፡፡ ጦማሪ ናትናኤል ፈለቀ እጁን አውጥቶ ‹‹መናገር የምፈልገው ነገር አለ›› በማለት ጥያቄ አቀረበ፡፡ ‹‹ስለጉዳዩ ጠበቃው ተናግረዋል፡፡›› ሲሉ የመሃል ዳኛው ተናገሩት – እንዲተው፡፡ የመሃል ዳኛው ‹‹ዘገባው በፍርድ ቤት ውሎ ላይ የመደምደሚያ ነገር ቀርቧል›› ሲል አቃቤ ሕግ አቤቱታ አቅርቧል፡፡ ጠበቃውም ምላሽ ሠጥተዋል፡፡ ተወያይተን ብይን እንሰጥበታለን›› አሉ በድጋሚ፡፡

እኒሁ ዳኛ ወደናትናኤል እያዩ ‹‹3ኛ ተከሳሽ ያለኸው ችሎት ውስጥ ነው፡፡ ወደኋላ ዞረህ አታውራ፡፡ ቁጭ በል፡፡ ችሎቱን የሚመራው ፍርድ ቤት ነው፡፡ ተው ተው ስትባል ተው!›› አሉትና ‹‹በአጠቃላይ ዘገባን በተመለከተ ከዚህ በፊት አስጠንቅቀናል፡፡ ፍርድ ቤት በማስረጃ ተረጋግጧል /አልተረጋገጠም፤ ተመስክሯል/አልተመሰከረም/ ነጻ ነው /አይደለም ይላል፡፡ ይሄን የሚለው ሌላ አካል አይደለም፡፡ በዚህ መንገድ ነው መዘገብ ያለበት፡፡ ተመስክሯል አልተመሰከረም የሚለው አይሰራም፡፡ አቃቤ ህግ በዝርዝር ያቀረበው ነገር የለም፡፡ ነገር ግን፣ በዚህ መንገድ ካልተዘገበ ለወደፊቱ ይስተካከል›› የሚል ብይን ሰጡ፡፡

ጦማሪ ናትናኤል እና ጋዜጠኛ አስማማው ወ/ጊዮርጊስ ‹‹የምንናገረው ነገር አለ›› ብለው እጃቸውን አወጡ፡፡ ‹‹በዚህ ጉዳይ ብይን ሰጥተናል ሌላ ነገር ከሆነ ነው …›› ሲሉ የመሃል ዳኛው በድጋሚ ተናገሩ፡፡ የማህሌት ጠበቃም እጃቸውን አውጥተው ‹‹ይሄንን ጉዳይ በተመለከተ ጠበቃው ተናገሩ የተባለው ተነሳ እንጂ ጠቅላይ ሚኒስትሩ እና በሚኒስትር ደረጃ ያሉ ሰዎች …›› ብለው እየተናገሩ እያለ ሰብሳቢው ዳኛ አቋረጧቸውና ‹‹ጠ/ሚኒስትርን …በተመለከተ ችሎቱ አይመለከተውም፡፡ (በዚህ የፍርድ ቤት ጉዳይ ላይ ያልቀረበ ነገር ለማለት ይመስለኛል) እኛ እዚህ ያለውን ጉዳይ ነው የምናየው፡፡ ችሎትን በማወክ …›› ሲሉ መልስ ሰጡ፡፡

ናትናኤል መናገሩን ቀጥሎ ‹‹በዚህ ጉዳይ ሀሳባችንን በነጻነት የመግለጽ መብታችን ተከልክሏል›› አለ፡፡ ‹‹እኛ እኮ ውሳኔ ለሁሉም ሰጠን፡፡›› ሲሉ ዳኛው በድጋሚ ተናገሩ፡፡ ናትናኤልም ‹‹ውሳኔው ለሁሉም ከሆነ፣ ለአቃቤ ህጉም ሆነ ለአለቃው ጠ/ሚኒስትር መሆን አለበት፡፡›› ሲል ገለጸ፡፡

መጨረሻ ረድፍ ላይ የቆመው ጦማሪ አቤል ዋበላም እጁን አውጥቶ መናገር ፈለገ፡፡ ዳኞቹ ‹‹ሥነ-ሥርዓት ያዝ›› አሉት ፡፡ እሱም ቆጣ ብሎ ‹‹እኛም የምንናገረው ነገር አለ፡፡ እናንተ ራሳችሁ ሥነ-ሥርዓት ያዙ! ይህ ችሎት ነው፡፡ ግልጽ ነው›› አለ፡፡

ዳኞች እርስ በእርስ መነጋገር ጀመሩ፡፡ የማህሌት ፋንታሁን ጠበቃ (እኔ ሳየው ለመጀመሪያ ጊዜ ነው) ወደአቤል ጋር መጥተው ትንሽ ተነጋገሩ፡፡ የቀኝ ዳኛው አዲስ ወረቅት አውጥተው መጻፋቸውን ቀጥለዋል፡፡ ጠበቃው ‹‹ተከሶሾቹ ሊጠይቁ የፈለጉት ሲቀርብ ስለታሰበው ሲዲ ነው፡፡ ከሶሊያና ጋር የሚገናኝ ሰለሆነ›› ሲሉ ለዳኞች ተናገሩ፡፡

ሰብሳቢ ዳኛው ‹‹አሁን ስለተፈጠረው ነገርስ (ስለአቤል ንግግር)?›› ሲሉ ጠበቃውን ጠየቋቸው፡፡ ‹‹በይቅርታ ይታለፍ›› የሚለው የጠበቃው መልስ ነበር፡፡ የቀኝ ዳኛው ‹‹ስለሚሉን ነገር (በይቅርታ ይታለፍ) ራሱ አቤል መልስ ይስጥ›› ካሉ በኋላ ‹‹ስሜታዊ መሆን ከእናንተ አይጠበቅም፡፡ የተማራችሁ ናችሁ፡፡ ፍርድ ቤትን ማክበር አለባችሁ›› ሲሉ ተናገሩ፡፡ አቤል ‹‹መናገር የፈለኩት …›› ‹‹አይ እሱን አይደለም፤ አሁን በስሜት ስለተናገርከው ነገር (መልስ ስጥ ነው)›› አሉት ዳኞቹ፡፡

አቤል ወደፊት ቀረብ አለና ‹‹እኔ ምንም አላጠፋሁም፡፡ የጠየኩት ሕገ-መንግሥታዊ መብታችንን ነው፡፡ መናገር እየቻልን ጥያቄያችንን በጽሑፍ አመልክቱ ለምን እንባላለን?›› ሲል መለሰ፡፡ ሰብሳቢው ዳኛ ‹‹አሁን የምትመልሰው በችሎት ይቀዳ›› አሉት፡፡ አቤልም ‹‹በድምጽ አልቀዳም፣ ጥያቄያችን አልተሰማም፡፡ ፍርድ ቤቱ በግልጽ ይስማን›› በማለት ወደቦታው ተመለሰ፡፡ ችሎቱም ወዲያው አቤልን በችሎት መድፈር ወንጀል ጥፋተኛ እንዳለውና ተገቢውን ቅጣት ለመወሰን ቀጠሮ እንደሚሰጥ ተናገረ፡፡

ጋዜጠኛ እና ጦማሪ በፍቃዱ ሃይሉም ተነስቶ ቆመ፡፡ ዳኛው ‹‹ተቀመጥ›› አሉት፡፡ ‹‹አልቀመጥም፣ ጉዳዩ የእኔም ነው›› ሲል መለሰ፡፡ ከፊት ያለው ናትናኤልም ቆመ፡፡ ‹‹ተቀመጥ›› አሉት፡፡ ‹‹የጓደኛዬ ጥያቄ የእኔም ነው›› ሲል ተናገረ፡፡

ጠበቃውም ‹‹ደንበኛዬ ችሎት ለመድፈር ሆን ብሎ ሳይሆን ቀደም ሲል ከተሰጠው ትዕዛዝ ጋር በተያያዘ ሊጠይቅ ሲል ዕድል የተነፈገ መስሎት ነው፡፡ ይሄንን በስሜት የተሞላ የተናገረውን ንግግር ችሎት በመድፈር ሳይሆን በተግሳጽ እንዲያልፈው ሲል እናመለክታለን›› አሉ፡፡ ዳኛው ይሄንን መልስ መዘገቡ፡፡
ችሎቱም በሰባተኛ ተከሳሽ አቤል ዋበላ ላይ ውሳኔ ለመስጠት ለግንቦት 25 ቀን 2007 ዓ.ም፣ እንዲሁም በ1ኛ ተከሳሽ ሶሊያና ሽመልስን የሚመለከተውን የአቃቤ ሕግ የሲዲ ማስረጃ ቀደም ብሎ በመመልከት ‹‹ሲዲው በግልጽ ቢታይ ችግር አለው ወይስ የለውም? ቀሪ ተከሳሾችን ይጎዳል አይስ አይጎዳም? በሚለው ላይ ውሳኔ ለመስጠት ለሰኔ 08 ቀን 2007 ዓ.ም ተለዋጭ ቀጠሮ ሰጥቷል፡፡

ናትናኤልም ‹‹ጓደኛዬ (አቤል) የሚቀጣ ከሆነ ውሳኔው እኔም ላይ ይታዘዝ›› ሲል ለችሎቱ ተናገረ፡፡ ዳኛውም ‹‹ሌሎቻችሁን አይመለከትም፡፡›› ካሉ በኋላ ለፖሊሶች ተከሳሾቹን ከችሎት እንዲያወጧቸው ትዕዛዝ ሰጡ፡፡ ናትናኤልም ‹‹የሚደረገው ነገር ዘላቂ መፍትሄ አይሆንም፤ ለሌሎችም ትምህርት አይሆንም›› በማለት ለዳኞች ድምጹን ከፍ አድርጎ ነገራቸው፡፡ ሰብሳቢው ዳኛው ‹‹በስሜት እየተነጋገርን የችሎት ሥራ እንስራ ታዲያ? …›› ሲሉ መለሱ፡፡ ፖሊሶችም ወደጦማሪያኑንና ጋዜጠኞቹ ተጠግተው ‹‹ከችሎት ውጡ›› በማለት በር ላይ በካቴና እጆቻቸውን እያሰሯቸው ወደእስረኞች መኪና ይዘዋቸው ሄዱ፡፡

እኛም ከችሎት ወጣን፡፡ እኔም የዛሬ ፍርድ ቤት ውሎን በቀድሞ የመንግሥት ጉዳዮች ኮሙኑኬሽን ጽ/ቤት ሚኒስቴር ዴኤታ የነበሩት አቶ ኤርሚያስ ለገሰ ‹‹የመለስ ትሩፋቶች›› በተሰኛው መጽሃፋቸው ላይ ባስተዋወቁን ‹‹የካሳንቺሱ መንግሥት›› መቀመጫ አቅራቢያ በሚገኝ አንድ ምግብ ቤት ውስጥ ላፕቶቴን አውጥቼ ያየሁትን፣ የሰማሁትንና የተከታተልኩትን እንዲህ ከትቤ አስነበብኳችሁ፡፡

መልካም ቀን!

የወያኔ/ኢህአዴግ ተግባር ፍየል ወዲህ ቅዝምዝም ወዲያ። በስብሰባ ጋጋታና በባዶ ፕርፖጋንዳ እንዳንፈታ ትግሉ ይፋፋም!

                                                                  የተሰጠ መግለጫ
የወያኔ/ኢህአዴግ ተግባር ፍየል ወዲህ ቅዝምዝም ወዲያ። በስብሰባ ጋጋታና በባዶ ፕርፖጋንዳ እንዳንፈታ ትግሉ ይፋፋም!
ግንቦት 14 ቀን 2007ዓ.ም
የችግራችን ቀጣይ ክስተቶች ለትምህርተ ሥርዓቱ ከጊዜ ወደ ጊዜ ማሽቆልቆልና የውድቀት ጠርዝ መድረስ አስተዋጽኦ ማድረጋቸው ባይካድም ያለፉትን መንግሥታት በመኮነን ከምንም በላይ ራሱን የለውጥ ሐዋሪያና የዕደገት ተምሳሌት አድርጎ የሚቆጥረው ወያኔ/ኢህአዴግ በዕውቀት ላይ የተመሰረተ የትምህርት አመራር ከመስጠትና ችግሮችን ከመፍታት ይልቅ ይበልጥ ውስብስብና ሊፈቱ ከማይችሉበት ደረጃ አድርሷቸዋል።
በሚሊዮን የሚቆጠሩ ተማሪዎች በመምህራን እጥረት፣በመማሪያ ክፍሎች፣ በማስተማሪያ መጻሕፍትና በሌሎችም የትምህርት ግብአቶች እጥረት የተነሳ የተሟላ ትምህርት የማያገኙበት፣ ተማሪዎች ከመቼውም ጊዜ በላይ ተስፋ የቆረጡበት ፣ ፈተና በአንድና በሁለት ደቂቃዎች ሰርተው የሚያጠናቅቁበት፣ ጭራሹን ትምህርታቸውን ለማቋረጥ የሚገደዱበት ወቅት ስለሆነ ትምህርት ቀውስ ውስጥ ገብቷል።
የዚህ ቀውስ አንዱ ማሳያ ሊሆን የሚችለው ወያኔ/ኢህአዴግ በሶስት ምድብ አመቻችቶ የማደናገሪያ /የማጭበርበሪያ አጃንዳዎቹን ለማስፈጸም የሚሞክርበትን አካሄድ ቀጥሎ እንመልከት፡-
ከመምህራን ጋር ፡-በአንዳንድ አካባቢዎች በህዳር ወር 2007ዓ.ም መጀመሪያ ሳምንት በተደረገ የመምህራን ስብሰባ ከ2006ዓ.ም በፊት በነበሩት አመታት ትምህርታቸውን ያቋረጡ ተማሪዎች እስከ ህዳር ወር መጨረሻ 2007ዓ.ም ድረስ ትምህርት ቤት እንዲገቡ የሚል ሐሳብ በወያኔ ካድሬዎች ይቀርባል።ለዚህ የተሰጠው ምክንያት የምዕተ ዓመቱ ( የሚሊኒየሙ) የልማት ግብ በዚህ በያዝነው አመት ስለሚጠናቀቅ አሁን በመማር ላይ ያሉት መማር ከሚገባቸው ተማሪዎች ቁጥር ያነሰ በመሀኑ ያቋረጡትን “በቅስቀሳ “ በማምጣት ከመስከረም 2007ዓ.ም ጀምሮ እየተማሩ ካሉት ጋር እኩል ማድረስና የምዕተ ዓመቱን “ ትምህርት ለሁሉም” የሚለውን ግብ ማሳካት በሚል የቀረበ አጀንዳ ነበር። በዚህ አጀንዳ ላይ የመማር ተግባራቸውን አቁመው ለዓመታት ከትምህርት ገበታቸው ተለይተው የቆዩ ተማሪዎችን የትምህርት መጀመሪያ ዓመት ካለፈ ከወራት በኋላ መቀበል ማለትም እስከ ሀዳር ወር 2007ዓ.ም ያልተማሩትን በምን ተአምር ትምህርት እንዲያገኙ ይደረጋል? ከትምህርት ተለይተው የቆዩት ተማሪዎች ለተለያዩ ደባል ሱሶች የተጋለጡ ሊኖሩ ስለሚችሉ በነባሮቹ ላይ ተጽዕኖ ስለሚያሳድር የትምህርት ቤቶችን ድሲፕሊን ይጎዳል በሚል መምህራን ተቃውመውታል።ሥርዓቱ ፊቱ ላይ የሚታየው የአፈጻጸም ሂደት የውጭ ርዳታ ማግኘትን ትኩረት ሰጥቶ ንዋይ መሰብሰብ ዋናው ዓላማ ሆኖ ትምህርቱና ትውልዱ እንዲሞቱ ተፈርዶባቸዋል በማለት አስተያየት እየሰጡ ስብሰባውን ረግጠው እሰከመውጣት ደርሰዋል።
ከዚህ በመቀጠል በታህሣሥ ወር መጨረሻ 2007ዓ.ም በአማራ ክልል የሁለተኛ ደረጃ ት/ቤቶች መምህራንና ተማሪዎች ለ3 ቀናት የሚቆይ

  •   የተሀድሶ መስመርና የኢትዮጵያ ህዳሴ
  •   የልማታዊ ዴሞክራሲያዊ ሥርዓትና በትግሉ የተገኙ ውጤቶችና ተግዳሮቶች
  •   የ2007ዓ.ም የትምህርት ንቅናቄ ሰነድ በሚሉ አጀንዳዎች ስልጠና የሚል ስያሜ ተሰጥቶት የስልጠናው ዓላማ መምህራንና ተማሪዎች በተጀመረው የልማትና የመልካም አስተዳደር ላይ ግልጽነት እንዲኖር ለማድረግ የሚል ሆኖ ቀጥሎ ያሉት ንዑስ ዝርዝሮች ተካተዋል።
  1. የተጀመሩትን ኢክኖሚያዊ፣ ማህበራዊና ፖለቲካዊ ለውጦች ከዳር ለማድረስና የአጋጠሙ ተግዳሮቶችን ፈትሾ የአገራችንን የተሀድሶ ጉዞ ከትምህርት ማህበረሰብ ጋር ያለውን ፋይዳ ለመመዘን፣
  2. ልማታዊ አስተሳሰብ የተሀድሶው መነሻ በመሆኑ ሁላችንም ልማታዊ አስተሳሰብ እንድንይዝ ለማስቻል፣
  3. የህዳሴው የጉዞ ደረጃና መድረሻ ምን እንደሆነ ለማስገንዘብ፣
  1. ችግሮችን መለየትና ለውጡን በጠራ አቅጣጫ ለመምራት የሚያስችሉ ግብአቶች ለማግኘት፣
  2. የተደራጀ የትምህርት የልማት ሠራዊት ግንባታ ለትምህርት ጥራት የማይተካ ዓላማ አለው፣ስለሆነም በተበታተነ
    አደረጃጀት ጥራት ማምጣት ካለው ፋይዳ ጋር ለመገምገም፣
  3. የ2007 ዓ.ም የትምህርት በጀት የዕድገትና የልማት ዕቅዱ ማጠቃለያ ስለሆነ የቀሩንን ለይተን ርብርብ ለማድረግ
    ሰላማዊ የመማር ማስተማር ሂደት ወሳኝ ስለሆነ ፣
  4. የአገራችን የተሀድሶና የህዳሴ ጉዞ የሚያጋጥሙትን ተግዳሮቶች አውቆ ርብርብ ለማድረግ እንዲያስችል ታስቦ
    የተዘጋጃ መሆኑ በካድሬዎች ተነግሮ አስፈላጊ ነው ወይስ አይደለም የሚል ጥያቄና የአስተያየት ሀሳብ ከራሳቸው ከካድሬዎች ይነሳል።

ለነዚህ ከላይ ለተዘረዘሩት በትምህርት ስልጠና ስም በወያኔ ለቀረበው የፖለቲካ አጀንዳ የመምህራን መልስ ይህ አቀራረብ በየቀኑ ከምንሰማው ፕሮፖጋንዳ የተለየ አይደለም፣ ሰነዱ የስልጠና ይዘት የለውም፣ለስልጠናም የሚያግዝ የማቴርያል ( የቁሳቁስ) አቅርቦት የለም፣ እንዲያውም በትምህርቱ የንፍቀ ዓመት ( የሴምስተሩ አጋማሽ ወቅት) መዘጋጀቱ የትምህርትን ሂደት የሚጎዳ ስለሆነ አስፈላጊ አይደለም የሚል በመሆኑ ውዝግብ ተፈጥሮ ስልጠና ተብዬው ለግማሽ ቀን ያህል ተቋርጦ ከቆየ በኋላ ከመምህራን ፍላጎት ውጪ በካድሬዎች ጫና ሊቀጥል ችሏል።
ከዚሁ ጋር ተያይዞ ከትምህርቱ ጉዳይ ጋራ በማጣመር የቀረቡት አንዳንድ ትምህርት ነክ አጀንዳዎች ዓላማቸው የወያኔን የተሳሳተ የፖለቲካ መሰመር ጥሩ ገጽታ ለማላበስ የቀረቡ ናቸው። ሐሳብን በነፃነት የመግለጽና የመደራጀት መብት ፣ የብሔርና የሃይማኖት እኩልነት ተረጋግጧል በማለት የውሸት ድስኩሩን በሰብሰባዎቹ ወቅት አቅርበዋል።እንዲሁም ከአማራ ክልል የተወሰደ መሬት የለም፣የድሮዋን ኢትዮጵያ የተሻለች አድርጎ ማቅረብ፣ የአማራ ሕዝብ እንደተዋረደና ዝቅ ተደርጎ እንደሚታይ ማቀንቀን፣ ፌዴራሊዝም ኢትዮጵያን ለማፈራረስ የታቀደ ነው ማለት ፣ የአንድ ብሔር የበላይነት እንዳለ አድርጎ መቀስቀስ የትምክህትና የጠባብነት መግለጫዎች ናቸው በማለት የወያኔ ካድሬዎች በሕዝብ ላይ የፈጸሙትንና እየፈጸሙ ያሉትን እውነት ክደዋል። መቼ ወያኔና እውነት ይታዋወቃሉ? በሀይማኖት ስም የፖለቲካ አጀንዳ ይዞ ወደ ሕዝብ መግባትና ሕገመንሥቱን መቃወምና ኢትዮጵያ የክርስቲያን ደሴት ናት አንድ አገር፣ አንድ ሀይማኖት፣ በመጅሊሶቻችን መሪዎቻችንን እንዳንመርጥ መንግሥት ጣልቃ እየገባ ነው ፤የሸሪአ ሕግ መመስረት አለበት ፤ የእስላም መንግሥት እናቋቁማለን ፤ በትምህርት ቤቶች መስገጃ ቦታ ይፈቀድልን የመሳሰሉት በክርስትናና በእስልምና እምነት ተከታዮች የሚንፀባረቁ የአክራሪነት መገለጫዎች ስለሆኑ በትግል መፍታት ይገባል ተብሎ በካድሬዎች በኩል ለቀረቡት አስተያየቶች የመምህራኑ መልስ ለካድሬዎች የቀና አልነበረም። ቀድሞውንም በስልጠናው ይዘትና አካሄድ ደስተኛ ያልነበሩት መምህራን ባንድ ድምፅ ተቃውሞቸውን በማሰተጋባት እኛ አንድ ነን፣ አትከፋፍሉን፣አንከፋፈልም በማለት በጩኸት፣ በፉጨት፣ በሞባይል ወኔ ቀስቃሽ የሆኑ የቀረርቶና የሽለላ ዜማዎችን በማሰማት የካድሬዎችን የውሸትና የተንኮል ፕሮፖጋንዳ ጆሮ ሳይሰጡ በወቅቱ መምህራን ያሳዩት ተቃውሞና የትግል ተነሳሽነት የሰርዓቱን ውድቀት አይቀሬነት አመላካች ነበር።
እንዲሁም በሌሎች የአገሪቱ ክፍሎች በትምህርትና በመምህራን ላይ የሚፈጸመው በደል ዘርፈ ብዙ ነው። በደቡቡ የአገራችን ክፍል የእርከን ጭማሪ ለርዕሳነ መምህራንና ለሱፐርባይዘሮች ተፈቅዶ ለመምህራን የተከለከለ መሆኑን ለተለያዩ የዞን ት/ቤቶች አሰተዳደር ከደቡብ የትምህርት ቢሮ የተለከው ደብዳቤ ያሳያል። ወያኔ ለይስሙላው ምርጫ መጠቀሚያ ለማድረግ የድርጅቱ አባል የሆኑትን መምህራን በትምህርት ቤት ቅጥር ግቢ በትምህርት ሰዓት ስብሰባ በማካሄድ በትምህርት ላይ በደል እየፈጸመ ይገኛል። በ11/07/2007 በሀድያ ዞን ውስጥ በዋቸሞ መሰናዶ ት/ቤት ለወያኔ የምርጫ ድራማ ለ25 የወያኔ/ኢህአዴግ አባል መምህራንና ሰራተኞች ስልጠና በሚል የትምህርት ፕሮግራም ተቋርጦ ስብሰባ እንዲገቡ በመደረጉ የቀሩት የድርጅቱ አባል ያልሆኑ 75 መምህራን በድርጊቱ በመናደድ ፣ በትምህርት ቤት የትምሀርትን ክፍለ ጊዜ በማቃወስ የፖለቲካ ስብሰባ መካሄዱን ተቃውመው ወደ ቤታቸው ሄደዋል። ተማሪዎቹም አስተማሪ ስላጡ ወደየቤታቸው ለመሄድ ተገደዋል። በዚህም ሁኔታ የትምህርት ስራ ለሁለት ቀናት ተቋርጧል።ይህን ሁኔታ በመከተል በአካባቢው በሚገኙ ት/ቤቶች የሚያስተምሩ የወያኔ ደጋፊ ያልሆኑ መምህራን ተመሳሳይ እርምጃ በመውሰድ ተቃውሟቸውን አየገለጹ መሆናቸው ተረጋግጧል። መቀጠል ያለበት የትግል ስልት ነው።
ከተማሪዎች ጋር በተደረገው ስብሰባም ከተነሱ ጥያቄዎች መካከል በሌሎች አገሮች የስልጣን ዘመን የተገደበ ነው።እናንተ ግን ወደ ስልጣን ከወጣችሁ 23 ዓመታት ሆናችሁ። ስልጣናችሁን ልቀቁ፣ እናንተን አንመርጥም፣ በቃችሁ። የሕግ የበላይነት አለ ትላለችሁ አቶ አንዳርጋቸው ጽጌን ከ6 ወራት በላይ እንዲሁም ሌሎችን ፍ/ቤት ሳታቀርቡ በእስር ማቆያታችሁ የተያዙ ሰዎች በአርባ ስምንት ሰአታት ውስጥ ፍ/ቤት የመቅረብ መብት አላቸው የሚለውን ሕገ መንግሥታዊ ድንጋጌ አይጻረርምዎይ? በትምህርት ቤት ተማሪዎችን በኢህአዴግ አባልነት ትመለምላለችሁ ፣ በህዋስ በአንድ ላምስት ታደራጃላችሁ፣ ትምህርት ቤት በማናቸውም ረገድ ከሃይማኖት ፣ ከፖለቲካ አመለካከቶችና ከባሕላዊ ተጽዕኖዎች ነፃ መሆን አለበት ከሚለው ሕገ መንግሥታዊ ድንጋጌ አይጻረርምዎይ? ተቃዋሚዎች ይህን በት/ቤቶች እንዲያደርጉ ተፈቅዳላችሁዎይ?—–የመሳሰሉትን ጥያቄዎች በማንሳትና ኢህአዴግ ይውደም!ኢትዮጵያ ለዘላለም ትኑር! የሚል መፈክር በማሰማት ስብሰባው ያለምንም መግባባት በልዩነትከመጠናቀቁም በሻገር ተማሪዎች ለነሷቸው ጥያቄዎች የወያኔ/ኢህአዴግ ካድሬዎች መልስ መስጠት ተስኗቸው እንደነበር ለመራዳት ተችሏል።

ወያኔ/ኢህአዴግ ከአባላቱ ጋር በጥር ወር 2007ዓ.ም መጨራሻ ባካሄደው ስብሰባ ከአባላቱ በርከታ ጥያቄዎችና አስተያየቶች ቀርበዋል። ከነዚህም ለተቃዋሚዎች መፈራረስ የኢህአዴግ እጅ አለበት ፣ ኢህአዴግ ዲሞክራሲ አለ ይላል ግን ያስራል፣ ይገርፋል፣ ይገድላል። ይህን እየፈጸማችሁ ከደርግ በምን ትሻላለችሁ? የአማራ ወጣቶች በሌሎች ክልሎች ተቀጥረው አይሰሩም? የሌሎች ክልሎች ወጣቶች ግን በአማራው ክልል እስከ መሾም ይደርሳሉ። የእኛ አገር የሕዝብ ተወካዮችና ሌሎችም ምርጫዎች ከሌሎች አገሮች ምርጫዎች ጋር እንዴት ይነጻጸራል? ለመንግሥት ሠራተኞች የተሰጠው የደመወዝ ጭማሪ ፍትሐዊ አይደለም። አርሶአደሩ ከይዞታ መሬቱ ያለበቂ ካሣ እየተፈናቀለ ነው ለዘለቄታው ምን ታስቦበታል? የድርጅት አባላት ድርጅቶቻቸውን ያማርራሉ ችግሩ ምንድነው? አየለ ጫሚሶና መሰሎቹ የኢህአዴግ ሽርጥ ለባሾች እንጂ ተቃዋሚ አይደሉም —ወዘተ የመሳሰሉ ጥያቄዎችና አስተያየቶች ተሰጥተው ከመድረክ መሪዎች የተሰጡ ምላሾች ቁጣን በመቀስቀሳቸው ስብሰባው ያለምንም መግባባት ተጠናቋል።
በሌላ በኩል በመንግሥት መስሪያ ቤቶችም ሆነ በትምህርት ቤቶች በበጀት እጥረት የተነሳ ስራ ወደ መቆም የተቃረበበት ፣ ካድሬዎች ከምርጫ ጋር በተያያዘ በስብሰባ የተጠመዱበትና ፍርሃታቸው ከምንጊዜውም በላይ ገዝፎ እርስ በርስ አለመተማመን ደረጃ ላይ የደረሱበት ፣ ሰራተኛው ፊት ለፊት ስርአቱን እየሞገተ ጥላቻውን በግልጽ እያሳየና ለስርዓት ለውጥ ለሕዝባዊ እምቢተኝነት ራሱን እያዘጋጀ እንደሆነ ይታያል።
የኑሮ ውድነቱ፣ የስራ ዋስትና ማጣት ፣ የመብት ረገጣው፣ የመልካም አስተዳደር እጦት —–ያስመረራቸው መምህራን የተለያዩ የመብት ጥያቄዎችን በማንሳት ላይ ይገኛሉ።ከእነዚህ ውስጥ የሚጠቀሱ በደሴ ከተማ የሚገኙ የአንዳንድ ት/ቤቶች መምህራን ለተመሳሳይ ስራ ተመሳሳይ ክፍያ ይደረግ፣የመምህራን የዕድገት መሰላል ( Career Structure) በአንዳንድ ክልሎች ተሻሽሎ ተግባራዊ ሲሆን በሌሎች ክልሎች ለምን አይተገበርም ? የቤት አበል ( Housing allowance) ለምን ተግባራዊ አይሆንም? የቤት መስሪያ ቦታ ያለምንም ክፍያ በነፃ ልናገኝ ይገባል። የትምህርት ጥራትን እናረጋግጣለን እየተባለ በይድረስ ይድረስ በዘፈቀደ በለብለብ ለመህራንና ለሌሎች ባለሙያዎች ስልጠና እየተሰጠ ነው፣ ይህ በአስቸኳይ እንዲቆም እንጠይቃለን። የተሰጠው የደመወዝ ጭማሪ የኑሮ ውድነቱን ያላገናዘበ ስለሆነ እንደገና ማስተካከያ እንዲደረግበት የሚሉ ጥያቄዎችን በማንሳት በየካቲት ወር 2007ዓ.ም መጀመሪያ ፒቴሽን ተፈራርመው ለሚመለከታቸው አካላት በማቅረብ ጥያቄዎቹ አስቸኳይ መልስ ካልተሰጣቸው የስራ ማቆም አድማ እንደሚያደርጉ አስታውቀዋል። ይህ በደሴ ከተማ መምህራን የተነሳው ጥያቄ በአገሪቱ የሁሉም መምህራን ጥያቄ፣ ከዚያም ባለፈ ባጠቃላይ የሠራተኞች ጥያቄ ስለሆነ ለተግባራዊነታቸው ዜጎች ሁሉ እንዲተባበሩና ትግሉን እንዲያግዙ በሰደት የኢትዮጵያ መምህራን ማህበር አባላት አስተባባሪ ኮሚቴ ጥሪውን ያቀርባል።
በዚህ ጽሑፍ ወያኔ/ኢህአዴግ መምህራንን ፣ ተማሪዎችንና የራሱንም አባላት በተለያዩ ጊዜያት ሰብስቦ ለማወያየት መሞከሩን አይተናል። በተለይ በመግቢያው ላይ በተመለከቱት የመወያያ አጀንዳዎች ላይ በነቂስ ለመተቸት አንድ መድበል የሚወጣው ስራ ይጠይቃል። በጥቂቱ ቀንጨብ አድርገን ለማሳየት እንገደዳለን። ልማታዊ አስተሳሰብ ምንጩ ጥሩ የኢኮኖሚ ፖሊሲ ነው። የፖሊሲው ቅኝት በአንድ ዘረኛ ፓርቲ ቁጥጥር በዋሉና ንብረትነታቸው የፓርቲው የሆኑ ኩባንያዎች ያለገደብ ያለውድድርም ተጠቃሚዎች በሆኑበት ስርአት ፣ ሌሎች የግል ባለሐብቶች ወደዳር በሚገፉበት ሁኔታ አባባሉ ጉንጭ አልፋ ከመሆን አይዘልም። የህዳሴው መነሻና መድረሻ ሕዝብ በወጉ እንዲያውቀውና እንዲቀበለው ያልተደረገ በሂደቱም የጠራ አቋም ይዞ በፍላጎት ላይ በተመሰረተ ስሜት የማይሳተፍበት ፣ የጉልበት፣ የዕውቀት፣ የማቴርያል፣ የገንዘብ እገዛ እንዲያደርግ የሚያዘጋጁ ስነልብናዊ ሁኔታዎች ባልተመቻቹበት ዕድገትና ትራንስፎርሜሽን ከየት ወዴት የሚለውን ጥያቄ ያስነሳል።በዚሁ ላይ ዕድገት በተመጽዋችነት ፣ በርዳታና በብድር ውጤታማ የሆነበት አገር በ50 እና 60 አመታት አልታየም። በተለይ ኢትዮጵያን በመሰሉ የአፍሪካ አገሮች ያተረፈው ነገር ቢኖር የአምባገነኖችን ኪስ ማሳበጥና የአገዛዝ ጡንቻቸውን ማጠንከር ሆኗል። ስለዚህ በአገዛዝ ስር ያለ ሕዝብ የዕድገትና ሽግግር መለኪያው የአገዛዙን ከንቱ ውዳሴ ከማጉላት ውጪ የሚታይ አይሆንም።
ስለትምህርት ፖሊሲው ሰንካላነት፣ ስለካርኩሉም፣ ስለመምህራን ምልመላና ስልጠና ስለትምህርት ግብአቶች ጥራትና ተደራሽነት ችግር—-በተለያዩ መግለጫዎች ለሕዝብ ለማሳወቅ ሞክረናል። ብዙ አገር ወዳድ ምሁራንም በተለያዩ ጊዜያት ስለትምህርቱ ውድቀትና ትውልድ ገዳይነት ትችት አቅርበውበታል።ሌላው ቀርቶ መምህራን በነፃነት በሙያቸው ተደራጅተው ስለትምሀርቱ ሂደት በተለይና ስለአገራቸው ጉዳይ ባጠቃላይ የበኩላቸውን አስተዋጽዖ እንዳያደርጉና ብሔራዊ ግዴታቸውን እንዳይወጡ በሚያግድ ፣በሚያደናቅፍና ማህበራትን በአንድ ፓርቲ ዕዝ በሚያስገባ ስርዓት “የተምህርት ሠራዊት ግንባታ” የሚል ርዕስ የተካተተበት አጀንዳ መምህራንን ለማደናገር ማቅረብ ቧልት በመሆኑ የወያኔ ስብሰባ ውሉ ጠፍቶበት መጠናቀቁ ታይቷል። ትምህርቱንና ትውልዱን የመግደል የወያኔ ስልት ገና ከመነሻው 42 የዩኒቨርሲቲ ዕውቅ መምህራንን በማባረር አሳይቷል።አሁን በቅርቡም ሁሉቱን ብርቱ የዩኒቨርሲቲ መምህራን አባሯል። ስለትምህርቱ ጥራትና ውድቀት ከተባራሪዎቹ አንዱ ዶ/ር ዳኛቸው አሰፋ ያለበቂ ዝግጅት፣ ብቃት ያላቸው መምህራን ሳይኖሩ፣ የትምህርት ግብአቶች በሚፈለገው ደረጃ ሳይመቻቹ በየጨካው ዩኒቨርሲቲ መክፈት ምርታማ ዜጎችን የማያወጣና የአገሪቱን አንጡራ ሀብት እንደማባከን እንደሚቆጠር አመላክተዋል።ማን ያርዳ የቀበረ ፣ ማን ይንገር የነበረ እንዲሉ። ይህ ሕዝብን የማደንቆር ፖሊሲ አንድ ቦታ ካልቆመ
የትውልድ ግድያው ይቀጥላል። የትምህርት አፓርታይድ የተከለው ወያኔ ሕዝብን አደንቁሮ የመግዛት ኃይሉ እየጎለበተ ከመሔዱ በፊት ወላጆች፣ተማሪዎች ፣ ሌሎች የሕብረተሰቡ አካላት ለአሁኑና ለተተኪው ትውልድ ዕጣ ፋንታ መቆም ይጠበቅባቸዋል።
ለዚህ ነው መምህራን በየወቅቱ ፣ በየቦታው የተቃውሞ ድምጻቸውን እያሰሙ ያሉት። በራሳቸው ላይ ቤንዚን በማርከፍክፍ መስዋዕት የሆኑት። ጩኸታቸውን ኢትዮጵያውያን በያሉበት አስተጋበተው ትውልዱን ከድንቁርናና ከሞት እንዲታደጉ በሰደት የኢትዮጵያ መምህራን ማህበር አባላት አስተባባሪ ኮሚቴ ጥሪውን በድጋሚ ያቀርባል።
ለስርዓት ለውጥ ትግሉ ይፋፋም!! በትምህርትና በባለሙያዎች ላይ መቀለድ ያብቃ!! ትምህርት የዕድገት መሰላል ነው! መወጣጫው አይፋለስ!!

ፊታችንን ከምርጫ ፓለቲካ ወደ ሁለገብ ትግል እናዙር!- የአርበኞች ግንቦት 7 መግለጫ

ginbot 7ምርጫ 2007 ተጠናቆ ተወዳዳሪም አወዳዳሪም የሆነው ህወሓት ይፋ ውጤት እስኪገልጽ እየተጠበቀ ነው። ሁሉ በእጁ ነውና ባለሥልጣኖቹ ምን ዓይነት ውጤት እንደሚስማማቸው እስከሚነግሩን ጥቂት ቀናት ይወስዱ ይሆናል። ከፈለጉ ሁሉን የፓርላማ ወንበሮች ሊወስዷቸው ይችላሉ፤ ካሻቸው ደግሞ ጥቂቱን ለተቃዋሚዎች ሊሰጡ ይችላሉ። ወሳኞቹ እነሱ ናቸው። በዚህ የፓርላማ ወንበሮች እደላ የኢትዮጵያ ሕዝብ ድምጽ አንዳችንም ሚና የለውም።
ምርጫ የሕዝብ የሥልጣን ባላቤትነት ማረጋገጫ ከሆኑ አቢይ ዲሞክራሲያዊ ተቋማት አንዱ መሆኑ የታወቀ ነው። ሆኖም ግን ነፃ ተቋማት በሌሉበት፤ በአምባገነኖች አስፈፃሚነት የሚደረግ ምርጫ የመራጮች ነፃ ፍላጎት መግለጫ በመሆን ፋንታ የገዢዎች ሥልጣን ማረጋገጫ መሣሪያ ይሆናል፤ ከአገራችን እየሆነ ያለውም ይህ ነው።
የዘንድሮው ምርጫ 2007 ከዚህ በፊት ከነበሩ በባሰ ለአፈና የተጋለጠ የነበረ መሆኑ ከጅምሩ በግልጽ የታየ ጉዳይ ነበር። በአንድነትና በመኢአድ ፓርቲዎች ላይ አገዛዙ የወሰደው የግፍ እርምጃ የዚሁ የምርጫ ዘረፋ ስትራቴጂ አካል ነበር። ከዚያ በተጨማሪም መራጮች እውነተኛ ፍላጎታቸውን በነፃነት መግለጽ እንይችሉ ዘርፈ ብዙ ጫናዎች ሲደረግባቸው ቆይቷል። የተወዳዳሪ ፓርቲዎች አባላት እንደተፎካካሪ ሳይሆን እንደጠላት ሲሳደዱ፣ ሲታሰሩ፣ ሲደበደቡና ሲገደሉ ሰንብቷል። በምርጫው ሰሞንና በዕለቱ በተለይ ከተሞች በባዕድ ጦር የተወረሩ መስለው ነበር። ይህ ሁሉ ስነልቦናዊና አካላዊ ተጽዕኖ ታልፎ የተሰጠው ድምጽ ቆጣሪው ራሱ “ተወዳዳሪ ነኝ” ባዩ ህወሓት ነው።
በእንዲህ ዓይነት ምርጫ መሳተፍ ትርፉ “በሕዝብ ድምጽ ተመረጥኩ የማለትን እድል ለአምባገኑ ህወሓት መስጠት ነው”፤ “ለዓለም ዓቀፍ ማኅበረሰብም የተምታታ መልዕክት ማስተላለፍ ነው”፤ ”ለህወሓት ተጨማሪ ገንዘብ ማግኛና የኢትዮጵያን ሕዝብ መከራ ማራዘሚያ ነው“ በሚል በዚህ ምርጫ ላይ ማዕቀብ እንዲደረግ አርበኞች ግንቦት 7 ለኢትዮጵያ ሕዝብ ጥሪ ማድረጉ ይታወቃል። በርካታ ወገኖቻችን የምርጫ ካርድ ቢያወጡም የደረሰባቸውን ጫና ተቋቁመው በምርጫው ባለመሳተፍ ላሳዩት ጽናት አርበኞች ግንቦት 7 አድናቆቱን ይገልፃል።
ህወሓት በስልጣን ላይ እስካለ ድረስ የምርጫ ጉዳይ እና የምርጫ ፓለቲካ ግንቦት 7 ቀን 1997 ዓም የተጠናቀቀ ቢሆንም እንኳን ተጨማሪ ማስረጃ ለሚፈልጉ ግንቦት 16 ቀን 2007 መጥቶላቸዋል። አሁን ከፊታችን የተደቀነው ጥያቄ የሚከተለው ነው – አገራችን ከህወሓት አፈና ነፃ ለማውጣት ያለን አማራጭ መንገድ ምንድነው?
አርበኞች ግንቦት 7: የአንድነትና የዲሞክራሲ ንቅናቄ ህወሓት ከኢትዮጵያዊያን ጫንቃ የሚወርደው ሕዝባዊ እምቢተኝነትና ሕዝባዊ አመጽን ባቀናጀ ሁሉገብ ትግል ነው ብሎ ያምናል። በዚህም መሠረት ለሁለቱም የትግል ዘርፎች ተስማሚ የሆኑ አደረጃጀቶችን አዘጋጅቷል።
ሕዝባዊ እምቢተኝነት፣ ታጋዩ ከመኖርያ ወይም ከሥራ ቦታው ሳይለቅ በህቡዕ የሚከናወን ትግል ነው። ሕዝባዊ አመጽ ደግሞ ከመኖሪያና ሥራ ቦታ ለቆ መንቀሳቀስን ይጠይቃል። ሁለቱም የትግል ዘዴዎች የህወሓትን ህጎች በመቃወም የሚደረጉ ናቸው። ሁለቱም የትግል ዘዴዎች ድርጅት፣ ዲሲሊንና ጽናትን ይጠይቃሉ። ለድላችን ሁለቱም የትግል ዘርፎች እኩል ዋጋ አላቸው። እናም ከዛሬ ጀምሮ እያንዳንዱ ኢትዮጵያዊ እንደዝንባለውና አቅሙ በሚመቸው የትግል ዘርፍ ይሳተፍ። ሕዝባዊ ኃይልን መቀላቀል የቻለ ይቀላቀል፤ ያልቻለው በያለበት ተደራጅቶ በሕዝባዊ እምቢተኝነት ይታገል።
በየመኖሪያ ሠፈሩና በሥራ ቦታዎች የሚቋቋሙ የአርበኞች ግንቦት 7 ማኅበራት በርካታ ሥራዎች አሏቸው። ከሁሉ አስቀድሞ ድርጅትን ማጠናከር የሁላችንም ድርሻ መሆኑ ሊዘነጋ አይገባም፤ እናም ትኩረታችን እዚያ ላይ እናድርግ። እያንዳንዳችን ከሚመስሉንና ከምናምናቸው ጋር ተነጋግረን እንደራጅ፤ ወያኔ የሸረሸረብንን በራስ መተማመን እና የእርስ በርስ መተማመንን መልሰን እንገንባ። ውስጥ ውስጡን ጠንካራ አገራዊ ኅብረት እንፍጠር፤ የዕለት ተዕለት ተግባሮቻችን ደግሞ አካባቢያዊ ይሁኑ። ድርጅታችንን እያጠናከርን ወያኔን ከሁሉም አቅጣጫ እንሸርሽረው እንገዝግዘው። በዚህ መንገድ በሚደረግ ሕዝባዊ ትግል የሚገኝ ድል ፈጣን ከመሆኑን በላይ የድሉ ሕዝባዊነት ጥያቄ ውስጥ የማይገባ ይሆናል።
ስለሆነም እያንዳንዱ ለውጥ ፈላጊ ኢትዮጵያዊ ታጥቆ እንዲነሳ፤ ወደ ተግባራዊ ትግል ፊቱን እንዲያዞር አርበኞች ግንቦት 7 ጥሪ ያቀርባል።
ድል ለኢትዮጵያ ሕዝብ!!!
የአርበኞች ግንቦት 7 መግለጫ

– See more at: http://www.zehabesha.com/amharic/archives/41754#sthash.k6FqTttQ.dpuf

የ2007ቱ ሀገራዊ ምርጫ አካሄዱና አፈጻጸሙም ነጻና ፍትሀዊ ስላልሆነ ውጤቱን ሸንጎ አይቀበለውም።

ገና ከጅምሩ፣ የተቃዋሚ ፓርቲወችን በመበታተን፣ መሪዎችንና አባላቶቻቸውን በማሰር፣ በማሳደድና በማዋከብ፤ ነጻ የሃሳብ ልውውጥ እንዳይኖርና አማራጭ ሃሳቦች ለህዝብ እንዳይደርሱ ነጻ የመገናኛ ብዙሃን ጋዜጠኞችንና ጦማራውያንን በግፍ ወደ እስር ቤት በመወርወርና የሚወዷትን ሀገራቸውን ጥለው እንዲሰደዱ በማድረግ፤ ከአገዛዙ ጋር እጅና ጓንት ሆኖ በጭቆና መሣርያነት የሚያገለግለውን የምርጫ ቦርድ በመጠቀም ተቃዋሚ ፓርቲዎችን በማፈራረስ የጀመረው ምርጫ ተብየ በትናንቱ እለት ተካሂዷል።

በዚህ ምርጫ ተብየ፣ የተስተዋለው ድባብ ተቃዋሚ የፖለቲካ ድርጅቶችን መፈናፈኛ በሚነሳ ሁኔታ እግር ከወርች አስሮ በተለያየ አሻጥር ቀፍድዶ እንዳይንቀሳቀሱ የሆነበት አካሄድ በግልጽ ሲታይ በአኳያው ደግሞ የገዠው ፓርቲ የሀገሪቱን ሀብትና ንብረት ገደብ በለለው ሁኔታ ለራሱ ጠቀሜታ እንደፈለገ ሲያውላቸው ተስተውሏል።

በሃገሪቱ ሙሉ ለሙሉ ማለት በሚቻል መልክ ገዠው ፓርቲ በብቸኛነት ተወዳዳሪም፣ አወዳዳሪም፣ ታዛቢም የሆነበትና የገዝው ወያኔ/ኢህአዴግ ካድሬዎች በምርጫ ጣቢያዎች በመገኝት ድምጹን ለመስጠት የተሰለፈን ህዝብ አንድ ባንድ የገዠውን ቡድን እንዲመርጡ በማሰፋራራት፣ አልፎ ተርፎም “እዚህ ላይ ምልክት አድርጉ” በማለት ከገዥው ቡድን ውጭ ማንንም እንዳይመርጡ በማድረግ ተግባር ላይ ተሰማርተው እንደዋሉ ተስተውሏል።

የሀገሪቱ ጠቅላይ ሚኒስቴር “ማን እንዳሸነፈ መናገር የሚችለው ምርጫ ቦርድ ብቻ ነው” ብሎ እንዳላለ ሁሉ የድምጽ መስጠቱ ሂደት እንደተጠናቀቀ ብዙም ሳይቆይ የራሱን ትእዛዝ ጥሰው የገዥው ቡድን ደጋፊ የሆኑ መገናኛ ብዙሀን (ለምሳሌ አይጋ ፎረም የተሰኝው ድረገጽ) “አዲሰ አባበን ሙሉ በሙሉ ኢህአዴግ አሽንፏል፣ የመድረክ መሪዎች የሆኑት ፕሮፊሰር በየነ ጴጥሮስ እና ዶክተር መረራ ጉዲና ተሸንፈዋል፣ ኢህአዴግ በመላው ሀገሪቱ አሽንፏል”…. ወዘተ የሚል ዜና አሰራጭተዋል።
እጅግ የሚያሰገርመው ደግሞ፣ ኢህአዴግ አሽንፏል፣ የተቃዋሚ ድርጅቶች አመራር አባላትም ተሸንፈዋል የተባለው፣ ድምጽ ተቆጥሮ ሳያልቅ መሆኑ ነው።

ይህ ታዲያ የሚያሳየው የተሰጠው ድምጽ ዋጋ እንዳልነበረው እና በያንዳንዱ የምርጫ ጣቢያ ማን እንደሚያሸንፍ በወያኔ/ ኢህአዴግ እና ይህንኑ ጉዳይ ለማስፈጸም ባቋቋመው ምርጫ ቦርድ ቀድሞ እንደተወሰነ ነው።
ባጠቃላይ ፣ ቅድመ ምርጫ የነበረው አካሄድ፣ በምርጫ መዳረሻ የተከሰቱት የመብት ረገጣዎች እና በምርጫው ቀን የተከሰተው ሁሉ ፣ ምርጫው በምንም መልኩ ፍትሃዊም ሆነ ዴሞክራሲያዊ እንዳልነበረ በትክክል የሚያሳዩ ነበሩ። በአጠቃላይ ፣ ምርጫ ተብየው በምንም መልኩ አንድን ምርጫ ነጻና ፍትሃዊ ለማለት የሚያሰችሉ መመዘኛዎችን አላሟላም።

ይህ ሁኔታ በሀገራዊ ደረጃ ለአምስተኛ ጊዜ መደገሙ አሳፋሪ ብቻ ሳይሆን አሳዛኝና እጅግ ታላቅ ቁጣን የሚቀሰቅስ ተግባር ነው። የኢትዮጵያ ህዝብ የጋራ ትግል ሽንጎ (ሽንጎ) የዚህን የተጭበረበረ ምርጫ አካሄድና ውጤት ሙሉ በሙሉ አይቀበለውም። የተፈጸመውን የመብት ረገጣም ያወግዛል።

የህዝብን መብት እየረገጡ ተደላድሎ በስልጣን ለመቀጠል ማሰብ ከታሪክም ከአካባቢ ሁኔታም አለመማር ነው።ህዝብ መብቱ ሲረገጥ አንገቱን ደፍቶ መገዛቱን ይቀጥላል ብሎ መገመት ደግሞ ከተራ ትምክህት የሚመነጭ ቅዠት ብቻ ነው። ወያኔ/ኢህአዴግ እና ተባባሪው የምርጫ ቦርድ ይህ የህዝብ መብት መጣስ ሊያስከትለው ለሚችለው ማንኛውም አደጋ ተጠያቂ እንደሚሆኑ ከወዲሁ ልናሰምርበት እንወዳለን።
ለኢትዮጵያ ህዝብ እና የህዝባችንን መብት ለማስከበር ለተንቀሳቀሱ ድርጅቶች ሁሉ ያለንን አክብሮት እየገለጽን የተነጠቅነውን መብታችንን፣ የታፈነውን ድምጻችንን፣ የተገፈፍነውን የዜግነት ክብራችንን ለማስከበር፣ የጋር ትግሉን በአዲስ ስሜት፣ በህ ብረት፤ አስፈላጊውን መስዋዕት በመክፈል ቆርጠን አንድንቀጥል ጥሪያችንን እናሰማለን።
ድል ለኢትዮጵያ ህዝብ
የኢትዮጵያ ሕዝብ የጋራ ትግል ሸንጎ

ቦርዱ የ5ኛውን ሀገር አቀፍ አጠቃላይ ምርጫ ጊዜያዊ ውጤት ይፋ አደረገ

ቦርዱ የ5ኛውን ሀገር አቀፍ አጠቃላይ ምርጫ ጊዜያዊ ውጤት ይፋ አደረገ

አዲስ አበባ፣ ግንቦት 19፣ 2007 (ኤፍ.ቢ.ሲ) የኢትዮጵያ ብሔራዊ ምርጫ ቦርድ የ5ኛውን ሀገር አቀፍ አጠቃላይ ምርጫ ጊዜያዊ ውጤት ይፋ አደረገ።

በዚህም መሰረት አዲስ አበባ ላይ ከ23 መቀመጫዎች ኢህአዴግ 23ቱንም መቀመጫዎች አግኝቷል።

ከትግራይ ክልል ቦርዱ ከደረሱት የ31 መቀመጫዎች ውጤት ህውሃት/ኢህአዴግ 31 መቀመጫዎችን፣ ከአማራ ክልል ከደረሱት የ107 መቀመጫዎች ውጤት ብአዴን/ኢህአዴግ 107 መቀመጫዎች፣ ከኦሮሚያ ክልል ቦርዱ ከደረሱት የ150 መቀመጫዎች ውጤት ኦህዴድ/ኢህአዴግ 150 መቀመጫዎችን፣ በኢትዮጵያ ሶማሌ ክልል ቦርዱ ከደረሱት የ16 መቀመጫዎች ውጤት ኢሶዴፓ 16 መቀመጫዎችን፣ ከቤንሻንጉል ጉሙዝ ክልል ከደረሱት የሰባት መቀመጫዎች ውጤት ሰባቱንም ቤጉዴፓ አግኝተዋል።

ከደቡብ ክልል ከደረሱት የ95 መቀመጫዎች ውጤት ዴኢህዴን/ኢህአዴግ 95 መቀመጫዎች፣  በጋምቤላ ክልል ጋህዴፓ ከሶስት መቀመጫዎች ሶስቱንም፣ በሀረሪ ክልል ሀብሊ ከ2 መቀመጫዎች አንዱን ሲያገኝ አንዱን ኦህዴድ/ኢህአዴግ፣ በድሬዳዋ ከተማ አስተዳደር ከሁለቱ መቀመጫዎች አንዱን ኦህዴድ/ኢህአዴግ ቀሪውን ሶህዴፓ አግኝተዋል።

ከአፋር ክልል ከደረሰው የስድስት መቀመጫዎች ውጤት አብዴፓ ስድስቱንም መቀመጫ አግኝቷል።

በኢትዮጵያ ህገ መንግስት መሰረት መንግስት ለመመስረት አንድ ፓርቲ 274 የህዝብ ተወካዮች ምክር ቤት መቀመጫዎችን ማግኘት የሚገባው ሲሆን፥ ቦርዱ  ዛሬ ባወጣው ጊዜያዊ ውጤት መሰረት ኢህአዴግ 408 መቀመጫዎችን አግኝቷል።

Election_2007_Result_1.jpg

Election_2007_Result_2.jpg

ምርጫ በአዲስ አበባ

ምርጫ በአዲስ አበባ

በቀዳማዊ ኃይለ ሥላሴ ዘመን አምስት የፓርላማ ምርጫዎችን (1948-1965)፣  በደርግ ዘመን የኢትዮጵያ ሕዝባዊ ዲሞክራሲያዊ ሪፐብሊክ (ኢሕዲሪ) ብሔራዊ ሸንጎን አንድ ምርጫ (1979)፣ በኢትዮጵያ ፌዴራላዊ ዴሞክራሲያዊ

ሪፐብሊክ (ኢፌዴሪ) አራት የፓርላማ ምርጫዎችን (1987-2002) ያካሄደችው አዲስ አበባ ከተማ፣ አምስተኛውን ምርጫ ግንቦት 16 ቀን 2007 ዓ.ም. አድርጋለች፡፡

ባለፈው እሑድ በተካሄደው የተወካዮች ምክር ቤት ምርጫ ለመሳተፍ አዲስ አበቤዎች ማልደው ነበር ከየምርጫ ጣቢያዎች የተገኙት፡፡ የመዲናይቱ ነዋሪዎች የ1997 ዓ.ም. ምርጫ ጥሎት በሄደው ጠባሳ ምክንያት እንደሌላው ኢትዮጵያዊ በእኩል ጊዜ ሁለቱንም ማለትም የክልልና የተወካዮች ምክር ቤት ምርጫ ባንዴ ለማካሄድ አልታደሉም፡፡ ከሌላው ሕዝብ በሁለት ዓመት ወደኋላ ዘግይተው ነው የክልል ምርጫውን የሚያካሂዱት፡፡ በመሆኑም በዕለቱ ለተወካዮች ምክር ቤት አባልነት ይመጥናሉ የሚሏቸውን ፓርቲዎች ሲመርጡ ውለዋል፡፡

ከ2002 ምርጫ ጋር ሲነፃፀር በዛ ያለ የሕዝብ ቁጥርና ሠልፍ የታየበትም ነው፡፡ በ2002 ዓ.ም. በአዲስ አበባ ምርጫ ለመዘገብ ሪፖርተር ከተዘዋወረባቸው አካባቢዎች አብዛኞቹ ምርጫ ጣቢያዎች ሠልፍም ሆነ የወጣቱ ክፍል አይበዛባቸውም ነበር፡፡ አመዝነው የሚታዩት እናቶች ነበሩ፡፡ የ2007ቱ ምርጫ ከ1997ቱ ጋር ሲነፃፀር ተቀራራቢ የሕዝብ መነቃቃት ነበረው ለማለት ባያስደፍርም ከ2002 ዓ.ም. ግን የሕዝቡ ተሳትፎ የተሻለ ነበር፡፡ መነቃቃትም ታይቶበታል፡፡

ከዚህ ቀደም በተደረጉ ሁለት ጠቅላላ ምርጫዎች ሁለት ፈጽሞ የተራራቁ ውጤቶችን ያስተናገደችው አዲስ አበባ፣ በምርጫ 2007 ተቃዋሚዎች ለማሸነፍ ተስፋ ያደረጉባት ሆና ነበር፡፡ በምርጫ 1997 ኢሕአዴግ አንድ ወንበር ከማሸነፍ ውጪ 22 ወንበሮችን ያሸነፈው በወቅቱ ጠንካራ ተፎካካሪ የነበረው ቅንጅት ነበር፡፡ በ2002 ዓ.ም. ይህ ውጤት ተገልብጦ ኢሕአዴግ 22 ወንበሮችን ሲያሸንፍ በወቅቱ ጠንካራ ተፎካካሪ የነበረው መድረክ ውስጥ የታቀፈው የአንድነት ተወካይ አቶ ግርማ ሰይፉ ብቸኛዋን ወንበር ማሸነፋቸው ይታወሳል፡፡

በምርጫ 2007 ምርጫ በተደረገባቸው አብዛኛዎቹ የምርጫ ጣቢያዎች በአዲስ አበባም የሚገኙ የምርጫ ጣቢያዎች ከንጋቱ 12 ሰዓት ጀምሮ ድምፅ መስጠት ተጀምሮ ምሽት 12 ሰዓት ላይ ተጠናቋል፡፡

በኢትዮጵያ በአጠቃላይ 36,851,461 ሕዝብ የምርጫ ካርድ የወሰደ ሲሆን፣ ከዚህ ውስጥ 1,481, 521 የአዲስ አበባ ነዋሪዎች ናቸው፡፡ ከኢትዮጵያ ብሔራዊ ምርጫ ቦርድ አዲስ አበባ ቅርንጫፍ ያገኘነው መረጃ ደግሞ፣ በአዲስ አበባ ለመምረጥ ከተመዘገቡት ውስጥ ድምፅ የሰጡት 1,342,582 እንደሆኑ ያሳያል፡፡

በሁለት መደዳ የተሠለፉት በርካታ መራጮች ድምፅ መስጫ ሰዓት እስከሚደርስ ይጠባበቃሉ፡፡ ጎህ ሳይቀድ በአቃቂ ቃሊቲ ክፍለ ከተማ (ምርጫ ክልል 26/27) ወረዳ ሰባት ምርጫ ጣቢያ አንድ ከተገኙት የመጀመርያዎቹ ተሠላፊዎች የ19 ዓመቷ ሰላም አስካለ  አንዷ ነች፡፡ የመጀመርያ ዓመት ሕክምና ተማሪ ናት፡፡ ‹‹የመጀመሪያዬ ምርጫ ስለሆነ ድምፅ ለመስጠት ጓጉቻለሁ፤ በለሊት የተገኘሁትም ለዚሁ ነው፤›› ትላለች፡፡ በፖለቲካ ፓርቲዎች መካከል በተደረገው ክርክር የምትመርጠውን እንደተገነዘበችና በፓርቲዎቹ መካከል የነበረውን ፉክክር ጠንካራ እንደነበር ትገልጻለች፡፡ ‹‹የአንድ ሰው ተሳትፎ ትልቅ ሚና ስላለው ያመንኩበትን ለመምረጥ ተዘጋጅቻለሁ፤›› ብላለች፡፡

በምርጫ ጣቢያው በተጣለው ድንኳን ድምፃቸውን ሰጥተው ሲወጡ ያነጋገርናቸው የ68 ዓመቱ አቶ ሀብተማርያም ምሕረትአብ፣ በአገሪቱ በተካሄዱ ምርጫዎች ባጠቃላይ ድምፅ መስጠታቸውንና የዘንድሮው ምርጫ ከቀደሙት የተሻለ ሆኖ እንዳገኙት ይናገራሉ፡፡ ‹‹ሰው ያለምንም ጫና እየመረጠ ነው፤›› ይላሉ፡፡

የ69 ዓመቱ አቶ ተፈራ ድሩ ሐሳቡን ይጋሯቸዋል፡፡ የዘንድሮውን ጨምሮ በሁሉም በኢሕአዴግ መንግሥት በተካሄዱ ምርጫዎች የሕዝብ ታዛቢ ሆነዋል፡፡ እንደሳቸው ገለጻ፣ የዘንድሮው ምርጫ ‹‹የተረጋጋና የሠለጠነ አካሄድ ያለው›› ነው፡፡ የፖለቲካ ፓርቲዎች ከምርጫ አስቀድመው ያደረጉት እንቅስቃሴ አገርን ለማሳደግ በቁጭት እንደተነሳሱ ያሳያል ይላሉ፡፡ ‹‹እንደቀደሙት ጊዜያት መናቆር የለም፤›› በማለት የሚሸነፉ ፓርቲዎች ከአሸናፊው ጋር በሰላም እጅ ለእጅ ተጨባብጠው ኑሮ በሰላም እንደሚቀጥል እምነታቸው ነው፡፡

በምርጫ ጣቢያው የሕዝብ ታዛቢዎችና የሲቪክ ማኅበራት ተወካዮች ተገኝተው ሒደቱን ይከታተሉ ነበር፡፡ የጣቢያው የምርጫ አስተባባሪዎችም የምርጫ ቅደም ተከተል ለሕዝቡ ያብራሩ ነበር፡፡ የምርጫ ክልሉ ኃላፊ አቶ ተሾመ አበበ በክልሉ በሚገኙ 110 የምርጫ ጣቢያዎች መሰል ሒደት እንዳለ ተናግረዋል፡፡ በሒደቱ ይህ ነው የሚባል ችግር እንዳልገጠማቸውና ቅሬታዎችም እንዳልተነሱ ለሪፖርተር ገልጸዋል፡፡

ረፋድ ላይ ሳር ቤት አካባቢ በምርጫ ክልል 20 በሚገኙ 59 የምርጫ ጣቢያዎች ኢሕአዴግን ወክለው የሚወዳደሩት የኢንዱስትሪ ሚኒስትር ዴኤታ አቶ ታደሰ ኃይሌ ድምፅ ሲሰጡ ሪፖርተር አግኝቷቸዋል፡፡ ‹‹ሕዝቡ በነቂስ ወጥቶ በሰላማዊ መንገድ መምረጡ አገሪቱን ለአፍሪካና የዓለም አገሮች ተምሳሌት ያደርጋታል፤›› ያሉት ሚኒስትር ዴኤታው የዴሞክራሲ ባህል እየዳበረ መሆኑን አመላካች እንደሆነ ይገልጻሉ፡፡

ሕዝቡ የሚመራውን ፓርቲ በራሱ ድምፅ መርጦ እንደሚያስቀምጥና በሰላማዊ መንገድ እንደሚጠናቀቅ ያላቸውን እምነት ገልጸዋል፡፡ በምርጫ ጣቢያው የመኢአድ ተወካይ ታዛቢ አቶ በለጠ የሺጥላ ምርጫው በጥሩ ሁኔታ መከናወኑን ይናገራሉ፡፡ በቦታው ከገጠማቸው ችግሮች አንዱ የምርጫ ካርድ ሳይዙ ወደ ጣቢያው የሚሄዱ ሰዎች ሲሆኑ፣ ግለሰቦቹ በምዝገባ ላይ ምርጫ ካርድ መውሰዳቸው ተረጋግጦ ተስተናግደዋል ብለዋል፡፡

ተመሳሳይ ችግር የተስተዋለው የምርጫ ክልል 19 ውስጥ ከተካተቱ አካባቢዎች በአንዱ መብራት ኃይል ኮንዶሚኒየም ነው፡፡ መታወቂያ ሳይዙ ድምፅ ለመስጠት ወይም የምርጫ ካርድ ሳይኖራቸው (እንደጠፋባቸው የሚናገሩም አሉ) ድምፅ ለመስጠት ወደ ምርጫ ጣቢያዎች ያመሩ ግለሰቦች ተስተውለዋል፡፡ በወረዳ 6 ምርጫ ጣቢያ 20 የሰማያዊ ፓርቲ ታዛቢ የነበሩና ስማቸው እንዲጠቀስ ያልፈለጉ ግለሰብ ያቀረቡት ቅሬታም ይኼው ነው፡፡

‹‹መታወቂያ የሌለው ወይም የጠፋበት ሰው የሕዝብ ታዛቢዎች የሚያውቁት ከሆነ እንዲመርጥ ይደረጋል፡፡ ሕጉ ባያስማማኝም ከምርጫ ቦርድ የወረደ ስለሆነ ተቀብያለሁ፡፡ መራጮች በዚህ ምርጫ ጣቢያ ያለመታወቂያ መምረጥ እንደማይቻል ሲገለጽላቸው፣ መጀመርያ ያለመታወቂያ ምርጫ ካርድ ሰጥታችሁናል፡፡ ስለዚህ መምረጥ እንችላለን የሚል ምላሽ ሰጥተዋል፤›› የሚሉት ታዛቢው፣ በሕጉ መሠረት መታወቂያ የሌላቸውን ሰዎች እናውቃቸዋለን ብለው ምስክርነት የሚሰጡት የሕዝብ ታዛቢዎች ብቻ ሳይሆኑ የኢሕአዴግ ታዛቢዎች ጭምር እንደነበሩ ይናገራሉ፡፡ አሠራሩ የአገሪቱን ሕግ የሚፃረር መሆኑን በማስረገጥ ታዛቢው ተከራክረው ያለመታወቂያ እንዳይመርጡ ያደረጓቸው ግለሰቦች ቢኖሩም የመረጡም አሉ ይላሉ፡፡

የምርጫ ጣቢያው ኃላፊ አቶ ታደሰ አሽኔ ቅሬታውን እንደማይቀበሉት ነው የገለጹት፡፡ እሳቸው እንደሚሉት፣ መታወቂያ የጠፋባቸው ወይም ያልያዙ የኮንዶሚኒየሙ ነዋሪዎች የሕዝብ ታዛቢዎች ማንነታቸውን እስካወቁ ድረስ ድምፅ እንዲሰጡ ተደርጓል፡፡ ከሕዝብ ታዛቢዎች ውጪ ግን የትኛውም የፖለቲካ ፓርቲ ስለግለሰቦቹ ማንነት ምስክርነት አልሰጠም ይላሉ፡፡

በጣቢያው የኢሕአዴግ ታዛቢ ወ/ሪት ጽጌ ፀጋዬ በበኩላቸው የምርጫ ካርድ ሲወስዱ መታወቂያ ኖሯቸው የጠፋባቸው ግለሰቦች በሕዝብ ታዛቢዎች እስከታወቁ ድረስ ድምፅ መስጠታቸው አግባብ ነው ይላሉ፡፡ የኮንዶሚኒየሙ ነዋሪዎች በርካታ በመሆናቸው የሁሉንም ማንነት ለማወቅ አይቻልም የሚሉት ታዛቢዋ፣ ማንነታቸው ሳይታወቅ የመረጡና ፓርቲያቸውም ጣልቃ ገብቶ እናውቃቸዋለን ያላቸው ግለሰቦች እንደሌሉ ገልጸዋል፡፡ በጣቢያው የሕዝብ ታዛቢ ወ/ሮ ዘውድነሽ ድንቁ እንደሚናገሩት፣ መታወቂያ የሌላቸውና እሳቸውና የተቀሩት የሕዝብ ታዛቢዎች ያላወቋቸው ሰዎች ድምፅ እንዳይሰጡ አግደዋል፡፡

በንፋስ ስልክ ላፍቶ ክፍለ ከተማ ሳሪስ የተካሄደውን የድምፅ ቆጠራ ሪፖርተር የተከታተለው በወረዳ 10 ምርጫ ጣቢያ ሰባትና ስምንት ነበር፡፡ 12 ሰዓት ካለፈ በኋላ የድምፅ መስጫ ኮሮጆዎች ተቆልፈው በአቆጣጠሩ ላይ የፖለቲካ ፓርቲዎች ተወካዮች፣ የሕዝብ ታዛቢዎች፣ የሲቪክ ማኅበራት ተወካዮችና የምርጫ አስፈጻሚዎች ተወያይተዋል፡፡

መራጮች ድምፅ በሚሰጡበት ወቅት ‹‹X›› ምልክት ማድረግ እንዳለባቸው ቢገለጽም፣ በመዘንጋት ወይም በተለያየ ምክንያት ‹‹ü›› ያደረጉት ድምፅ እንደሰጡ መቆጠር አለበት የሚል ክርክር በምርጫ ጣቢያ ሰባት ቢነሳም ተቀባይነት አላገኘም፡፡ ከአሻራና ‹‹X›› ምልክት ውጪ ያሉ ወረቀቶች ፊርማ ወይም ጽሑፍ የተቀመጠባቸውና ከአንድ በላይ ፓርቲ ላይ ምልክት የተደረገባቸው ድምፅ አልባ ሆነዋል፡፡

በሁለቱ ምርጫ ጣቢያዎች ለሰዓታት የዘለቀው ቆጠራ ሁሉንም ታዛቢ አካላት ለማሳተፍ የተሞከረበት ነበር፡፡ በምርጫ ጣቢያ ሰባት ታዛቢ የነበሩት የመድረክ ተወካይ አቶ ኪሳ ተመስገን፣ ምርጫ ቦርድ ባወጣው ሕግ መሠረት ቆጠራው መካሄዱንና ሒደቱም ‹‹ፍትሐዊ ነው›› ብለዋል፡፡ በጣቢያው የኢሕአዴግ ተወካይ አቶ የሥጋት ፈጠነም ቅሬታ እንደሌላቸው ነው የተናገሩት፡፡

በዞን ሁለት ምርጫ ክልል 24 ጦር ኃይሎች አካባቢ የተወዳደሩት የመኢአድ ፕሬዚዳንት አቶ አበባው መሐሪ ምርጫ ባደረጉበት ወቅት እንደገለጹት፣ ምርጫው ካልተጭበረበረ እንደሚያሸንፉ ነው፡፡ አቶ አበባው በዕለቱ ለመምረጥ የምርጫ ካርዳቸውን ይዘው የነበረ ቢሆንም ከሚመርጡበት ጣቢያ ስምዎት የለም በመባላቸው ሲንከራተቱ ነበር፡፡ ሆኖም ተሳክቶላቸው በዞን ሁለት ምርጫ ክልል 24 ምርጫ ጣቢያ ስምንት ላይ መምረጥ ችለዋል፡፡

በዞን ሦስት ምርጫ ክልል 18 የተወዳደሩት የ32 ዓመቷ ወ/ሮ ዳግማዊት ሞገስ በአዲስ አበባ ኢሕአዴግን ወክለው ለተወካዮች ምክር ቤት ከቀረቡ 23 ዕጩዎች አንዷ ናቸው፡፡ በአዲስ አበባ ከተማ አስተዳደር አቅም ግንባታ ቢሮ ምክትል ቢሮ ኃላፊ በመሆን እያገለገሉ የሚገኙት ወ/ሮ ዳግማዊት፣ የምርጫ ጣቢያዎቹ ሒደት ጥሩ ሊባል የሚችል፣ እናቶች፣ ወጣቶችና አዛውንቶች ያዩባቸውና ይኽም ኅብረተሰቡ ዴሞክራሲያዊ መብቱን ለመጠቀም ያለውን ዝግጅት ያሳየ ነው ብለዋል፡፡ እንደ ወ/ሮ ዳግማዊ የ2007 ዓ.ም. ምርጫ ከ2002 ጋር ሲነፃፀር በሒደቱ የተሻለ ነው፡፡

በዞን ሁለት ምርጫ ክልል 24 ጣቢያ 2 ድምፅ የሰጡት የመንግሥት ኮሙዩኒኬሽን ጉዳዮች ጽሕፈት ቤት ሚኒስትር ዴኤታ አቶ እውነቱ ብላታ ምርጫው ሰላማዊና ተፎካካሪ ፓርቲዎችም የሒደቱን ሰላማዊነትና አሳታፊነት በቃላቸው የገለጹበት መሆኑን ጥቃቅን ችግሮች ሲከሰቱ ወዲያው የመፍታት ሒደት እንደነበር አመልክተዋል፡፡

በአዲስ አበባ ካሉ የምርጫ ክልሎች ውስጥ በምርጫ ክልል 17 (ቦሌ) የተሻለና የተቀራረበ ውጤት እንዲጠበቅ ላደረገው ግምት መነሻ የሆነው ደግሞ በክልሉ የሚወዳደሩት እጩዎች ማንነት ነው፡፡ ገዥው ፓርቲ ኢሕአዴግ በአዲስ አበባ አስተዳደር የኢንዱስትሪ ቢሮ ኃላፊ በአቶ ዮሐንስ በቀለ፣ ሰማያዊ ፓርቲ በሕዝብ ግንኙነት ኃላፊው በአቶ ዮናታን ተስፋዬ፣ ኢዴፓ በሕዝብ ግንኙነት ኃላፊው በአቶ ወንድወሰን ተሾመ እንዲሁም ኢራፓ በፕሬዚዳንቱ በአቶ ተሻለ ሰብሮ ተወክለው ነበር፡፡

ሪፖርተር በምርጫ ክልሉ በሚገኙ ጣቢያዎች ውስጥ ያገኛቸው የምርጫ አስፈጻሚዎችና ታዛቢዎች ሒደቱን ያልተረዱት መራጮች እጅግ ትንሽ እንደሆኑና አብዛኛዎቹ ግን ስለ ሒደቱ አስቀድመው ግንዛቤው ያላቸው እንደነበሩ ገልጸዋል፡፡ በምርጫ ክልሉ በሚገኘው ወረዳ 13 ውስጥ 18 የምርጫ ጣቢያዎች ያሉ ሲሆን፣ ገርጂ ታክሲ ተራ አካባቢ የሚገኘው ምርጫ ጣቢያ 4 ኃላፊ አልማዝ ደሳለኝ ለሪፖርተር እንደገለጹት፣ በጣቢያው ድምፃቸውን የሰጡት መራጮች ያለምንም ግራ መጋባት ሒደቱን ፈጽመዋል፡፡ የወረዳ 6 የምርጫ አስተባባሪ አቶ ታምራት ፍርድአወቅ በተመሳሳይ መራጩ ሒደቱን አስቀድሞ ተረድቶ በመምጣቱ አስረዱኝ ብሎ የሚጠይቀው እጅግ ጥቂቱ ብቻ እንደሆነ ገልጸዋል፡፡ በምርጫ ሒደት ውስጥ ከሽግግር መንግሥቱ አንስተው ተካፋይ እንደሆኑ የገለጹት አቶ ታምራት፣ የሕዝቡ ንቃተ ህሊና ከምንጊዜውም በላይ አሁን ያደገ መሆኑን አመልክተዋል፡፡

በወረዳ 3 ከሚገኙ የምርጫ ጣቢያዎች በአንዱ ያገኘናቸው የኢሕአዴግ ታዛቢ አቶ አዲሱ አካለ የምርጫ አስፈጻሚዎች የተሻለ አቅምና አደረጃጀት በመገንባታቸው መራጩ በቀላሉ በምርጫው ሒደት እንዲያልፉ አስችሏል፡፡ በዚያው የምርጫ ጣቢያ ያገኘናት የሰማያዊ ፓርቲ የምርጫ ታዛቢ ወጣት ቅድስት ግርማ መራጮች ምን ማድረግ እንዳለባቸው በሚገባ የተረዱ እንደሆኑ አስገንዝባለች፡፡ ይሁንና በአብዛኛዎቹ የምርጫ ጣቢያዎች የተቃዋሚ ፓርቲዎች ታዛቢዎች አልነበሩም፡፡

በምርጫ ሒደቱ ሲሳተፉ ካገኘናቸው መካከል አቶ ገናናው ጃቢር፣ ወጣት ሔኖክ ተስፋዬና ወጣት አሰገደች አብርሃም በሒደቱ በመሳተፍ በአገራቸው ጉዳይ ላይ ውሳኔ በማሳረፋቸው ደስተኛ መሆናቸውን ገልጸዋል፡፡ የ21 ዓመቱ ወጣት ሔኖክ ለመጀመሪያ ጊዜ በምርጫ መሳተፉ ነበር፡፡ ‹‹የምፈልገውን ተወካይ በነፃነት በመምረጥ በአገሬ ጉዳይ ላይ ውሳኔ ለማሳለፍ የምችልበት ዕድሜ ላይ በመድረሴ ደስተኛ ነኝ፤›› ብሏል፡፡

በምርጫ ጣቢያ 4 የድምፅ መስጠት ሒደቱ 12 ሰዓት ምሽት ላይ ተጠናቆ ቆጠራው 1 ሰዓት ተጀምሮ ከምሽቱ 5 ሰዓት ላይ እስኪጠናቀቅ ሪፖርተር ሒደቱን የተከታተለ ሲሆን፣ በጣቢያው የተቃዋሚ ፓርቲ ታዛቢዎች ተገኝተው ነበር፡፡

በምርጫ ክልል 5 መርካቶ አካባቢ በሚገኝ የምርጫ ጣቢያ ማልደው ከመጡ መራጮች ውስጥ አንዱ በሠላሳዎቹ የዕድሜ ክልል ውስጥ የሚገኘው ታሪኩ ደምሴ ነበር፡፡

ታሪኩ በ1997 ዓ.ም. እና 2002 ዓ.ም. በተደረጉት ጠቅላላ ምርጫዎች ተሳትፏል፡፡ ‹‹የሚበጀኝን ፓርቲ የመረጥኩበት መሥፈርት የፓርቲው የወደፊት ራዕይና እስካሁን ያሳያቸው ነገሮች ናቸው፡፡ ይህንንም ከተከታተልኳቸው የምርጫ ክርክሮች ተረድቻለሁ›› ሲል አስተያየቱን ለሪፖርተር ተናግሯል፡፡

በምርጫ ክልል 5 በ2002 ዓ.ም. በተደረገው ጠቅላላ ምርጫ መድረክ አብላጫ ድምፅ በማግኘት ያሸነፈበት ነው፡፡ መድረክን የወከሉት አቶ ግርማ ሰይፉ ብቸኛው የተቃዋሚ ፓርቲ የሕዝብ ተወካዮች ምክር ቤት ተመራጭ መሆናቸው ይታወሳል፡፡

በዚሁ የምርጫ ክልል ዘንድሮ ኢሕአዴግና መድረክን ጨምሮ 12 የፖለቲካ ፓርቲዎች ተፎካክረዋል፡፡ ምርጫ ክልል 5 የሰማያዊ ፓርቲ ፕሬዚዳንት ኢንጂነር ይልቃል ጌትነት በዕጣ ከተወዳዳሪነት ውጪ በመሆናቸው ፓርቲው በዚህ ክልል ተወዳዳሪ አልነበረውም፡፡

ቲና ወልደ ማርያም፣ ከእህቷ ከቤዛ ወልደ ማርያምና ከጎረቤቷ ውድነሽ ወርቁ ጋር በመሆን ቲና የስድስት ወር ውድነሽ ዓመት ከሁለት ወር የሆናቸውን ወንድ ልጆቻቸውን ታቅፈው ድምፅ ለመስጠት ማልደው ካዛንቺስ ኢንተርኮንቲኔንታል ሆቴል ፊት ለፊት በሚገኘው የምርጫ ጣቢያ ተገኝተዋል፡፡

ቲናና ውድነሽ በምርጫ ክልል 15 የነባር ቀበሌ 31 ምርጫ ጣቢያ አዳራሽ ውስጥ የተገኙት በዕለቱ ወንድ ልጆቻቸውን ኪዳነ ምሕረት ከማቁረባቸው በፊት ለመምረጥ እንደሆነ ነግረውናል፡፡

በእነዚህ ጣቢያዎች ከሚወዳደሩት 12 ፓርቲዎች መካከል የኢሕአዴግ፣ የሰማያዊ፣ የመድረክና የመኢአድ ታዛቢዎች የተገኙ ሲሆን፣ በድምፅ አሰጣጥ ሒደቱ ችግር እንዳላጋጠማቸው ገልጸዋል፡፡

ሾላ መገናኛ አካባቢን ከያዘው ምርጫ ክልል 16 ውስጥ ከሚገኙት የድምፅ መስጫ ጣቢያዎች አንዱ የሆነውና መገናኛ የካ ተራራ ላይ የሚገኘው የወረዳ 5 ምርጫ ጣቢያ 4 የቦታው አቀማመጥና አቀበታማው መልክዓ ምድርና ወደ ጣቢያው የሚወስዱት መንገዶች በቀላሉ ለመንቀሳቀስ አዳጋች ነበሩ፡፡

ምንም እንኳ ጣቢያው የሚገኝበት ቦታ አቀማመጥ ቀና ባይሆንም መራጮችን በሰዓቱ ተገኝተው ድምፅ የመስጠቱን ሒደት እንዳልገደበው የጣቢያው አስተባባሪ አቶ ሰለሞን አሞኘ ገልጸውልናል፡፡

በአዲስ ከተማ ክፍለ ከተማ በወረዳ ዘጠኝ ከሚገኘው የምርጫ ጣቢያ ሦስት ቅጥር ግቢ አጠገብ አንዲት በዕድሜ የገፉ ባልቴት በምርኩዛቸው እየተደገፉ ወደ ቤታቸው ሲያመሩ አግኝተናቸዋል፡፡ ባልቴቷ ወ/ሮ ጠይባ አቡበከር ይባላሉ፡፡ ወይዘሮ ጠይባ እንዳጫወቱን ከሆነ ዕድሜያቸው 100 ሊሞላ ሦስት ዓመት ብቻ ነው የቀረው፡፡ “ሌላ የምርጫ ካርድ ለማምጣት ወደ ቤቴ እየሄድኩ ነው፤” አሉን፡፡

ወ/ሮ ኤልሳቤጥ ደበበ የጣቢያው ምርጫ አስፈጻሚ የሚሉት ደግሞ ባልቴቷ ለመምረጥ በቅድሚያ መመዝገባቸው ተረጋግጧል፡፡ ይሁን እንጂ ሳይመርጡ የተመለሱትም በ2005 ዓ.ም. በተካሄደው ምርጫ የተመዘገቡበትን የምርጫ ካርድ ይዘው በመምጣታቸው በመሆኑ የአሁኑን ምርጫ ካርድ ይዘው መጥተው እንዲመርጡ ተነግሯቸዋል፡፡

ሽሮ ሜዳ አካባቢ በሚገኘው የዞን 4 ምርጫ ክልል 11 ጣቢያ ጧት 2፡20 ሰዓት ላይ ተገኝተው ድምፅ የሰጡት የሰማያዊ ፓርቲ ዕጩው አቶ ስለሺ ፈይሳ የፓርቲው ምክትል ፕሬዚዳንትና የምርጫ ጉዳዮች አስተባባሪ ናቸው፡፡ በምርጫው ሒደት ታዛቢዎቻቸው በተዘዋዋሪ ታዛቢዎች ምርጫውን ለመከታተል እንደሞከሩ ገልጸውልናል፡፡

በወረዳ 11 ሪፖርተር በተዘዋወረባቸው የምርጫ ጣቢያዎች የተለያዩ የምርጫ ታዛቢዎችን የተመለከተ ቢሆንም፣ በ20 የምርጫ ጣቢያዎች ውስጥ ከተቃዋሚ ፓርቲዎች የተገኘው አንድ የሰማያዊ ፓርቲ ታዛቢን ብቻ ነው፡፡ ከዚህ ውጪ የኢሕአዴግ፣ የሲቪክ ማኅበራት ጥምረትና የሕዝብ ታዛቢዎችን ተመልክቷል፡፡

በሌላ በኩልም በአዲስ አበባ ዩኒቨርሲቲ በሚገኙ 17 የምርጫ ጣቢያዎችም የክልል ተወላጆች ሲመርጡ ውለዋል፡፡ ሆኖም እስከ ቀኑ 8፡30 ድረስ ለአንዳንዶቹ የመምረጫ ሰነድ ተማልቶ ባለመቅረቡ መራጮች ተቸግረው ነበር፡፡

በዩኒቨርሲቲው ሥር በሚገኙ 15 ካምፓሶች የሚማሩ 7,029 የክልል ተወላጆች በክልልና የሕዝብ ተወካዮች ምክር ቤት ምርጫ ለመሳተፍ ካርድ የወሰዱ ሲሆን፣ ከነዚህ ውስጥ ከትግራይ አክሱም፣ ከጋምቤላ አንዳንድ አካባቢዎች፣ ከአማራ አምባሰል፣ ከሐረሪ አንዳንድ አካባቢ ለመጡ ተማሪዎች በምርጫው ሙሉ ለሙሉ ለመሳተፍ የሚያስችላቸው ሰነድ እስከተጠቀሰው ሰዓት ድረስ ተሟልቶ አልቀረበም፡፡

የዩኒቨርሲቲው ተማሪዎች ኅብረት ፕሬዚዳንት አቶ ቢኒያም ጫኔ እንደሚሉት፣ ችግሩ የተፈጠረው በዩኒቨርሲቲው ሳይሆን በምርጫ ቦርድ ነው፡፡ በመሆኑም ችግሩን ለምርጫ ቦርድ አሳውቀዋል፡፡ የምርጫ ቦርድ በሰጠው መግለጫ በአዲስ አበባ ዩኒቨርሲቲና በክልል በሚገኙ ከፍተኛ ተቋማት ምርጫ ሒደት ላይ ለተፈጠረው ክፍተት ይቅርታ ጠይቋል፡፡ አንድም ተማሪ ሳይመርጥ እንደማይቀርና ችግሩም እንደሚፈታ አሳውቋል፡፡ የአዲስ አበባ ዩኒቨርሲቲ ተማሪዎች በዕለቱ ሰነድ ተሟልቶላቸው ምርጫ ያጠናቀቁ ሲሆን የክልል ተማሪዎች ግን ምርጫውን ያጠናቀቁት በማግስቱ ሰኞ ነው፡፡

በአዲስ አበባ ዩኒቨርሲቲ ዋናው ግቢ ሲመርጥ ያገኘነው የ23 ዓመቱ ይድነቃቸው ጥላሁን ውልደቱ ኢሉአባቡራ ዞን ጎሬ ከተማ ሲሆን፣ የሁለተኛ ዓመት የሶሻል ወርክ ተማሪ ነው፡፡

ለመጀመርያ ጊዜ በምርጫ እንደተሳተፈ የሚናገረው ይድነቃቸው በያሉበት ዩኒቨርሲቲ ሆነው መምረጣቸው መልካም አጋጣሚ ነው፡፡ በዩኒቨርሲቲ ተከልለው መምረጣቸውም ምንም ጫና እንደማይፈጥርበት፣ የመምረጥም ሆነ ያለመመረጥ መብቱን ሊጠቀም እንደሚችልም ነው የገለጸልን፡፡

በአዲስ አበባ ዩኒቨርሲቲ በቢሾፍቱና በፍቼ የሚገኙት ካምፓሶችን ጨምሮ በ17 የምርጫ ጣቢያዎች የአማራ፣ የኦሮሚያ፣ የደቡብ፣ የትግራይ፣ የቤኒሻንጉል ጉሙዝ፣ የአፋር፣ የኢትዮጵያ ሶማሌ፣ የሐረሪና የጋምቤላ ተወላጅ ተማሪዎች ድምፅ ሰጥተዋል፡፡

በተያያዘም በአዲስ አበባ ከተማ በዞን 5 የምርጫ ክልል በወረዳ 2 እና 14 ምርጫ ጣቢያ፣ በብሔራዊ ሎተሪ ግቢ ድምፅ መስጫ የተዘጋጀላቸው የሐረሪ ብሔረሰብ ተወላጆች፣ ለክልልና ለሕዝብ ተወካዮች ምክር ቤቶች ድምፅ ሰጥተዋል፡፡ በክልሉ የሚንቀሳቀሱ ፓርቲዎች ሦስት ቢሆኑም፣ ለውድድሩ ብቸኛ ተወዳዳሪ ሆኖ የቀረበው ሐብሊ (የሐረሪ ብሔራዊ ሊግ) መሆኑን አስተባባሪው አቶ አደም አቡበከር ለሪፖርተር ገልጸዋል፡፡

በአዲስ አበባ ነዋሪ ለሆኑት ሐረሪዎች ክልላቸውን የሚመሩላቸው 14፣ በፓርላማ የሚወክሏቸውን አንድ ዕጩ ለመምረጥ በአዲስ አበባ በተለያዩ አምስት ጣቢያዎች ሲመርጡ መዋላቸውን አውስተዋል፡፡ ለፓርላማው ብቸኛ ተወዳዳሪ ሆነው የቀረቡት ወ/ሮ ኑሪያ አብዱራህማን ኡመር ናቸው፡፡ በአዲስ አበባ የሚኖሩ ሐረሪዎች ለሚኖሩበት ወረዳ በፓርላማ የሚወክላቸውን፣ በሐረሪነታቸውም ከሐረር በፓርላማ ለሚወክላቸው ድምፆች ይሰጣሉ፡፡

የሐረሪ ተወላጆች ከሌሎች ክልሎች በተለየ ሁኔታ በአዲስ አበባ ከተማ ከ1987 ዓ.ም. የመጀመሪያው ዙር ምርጫ ጀምሮ እንደሚመርጡ ይታወቃል፡፡

(ዘገባውን ያጠናቀሩት ምሕረተሥላሴ መኰንን፣ ምሕረት ሞገስ፣ ታምሩ ጽጌ፣ ታደሰ ገብረማርያም፣ ይበቃል ጌታሁን፣ ቴዎድሮስ ክብካብ፣ ሚኪያስ ሰብስቤ፣ ሰሎሞን ጎሹና ሔኖክ ያሬድ ናቸው)

ተቃዋሚ ፓርቲዎች በታዛቢ ድርቅ የተመቱበት ምርጫ

ተቃዋሚ ፓርቲዎች በታዛቢ ድርቅ የተመቱበት ምርጫ

ባለፈው እሑድ ግንቦት 16 ቀን 2007 ዓ.ም. በተካሄደው የምርጫ 2007 የድምፅ አሰጣጥ ሥነ ሥርዓት ላይ የታየው ለየት ያለ ክስተት፣ የተቃዋሚ የፖለቲካ ፓርቲዎች ታዛቢዎች ጉዳይ ነው፡፡

አዲስ አበባ ከተማን ጨምሮ ሪፖርተር በተሰማራባቸው ብዙዎቹ የክልል ከተሞች በአብዛኛው የተቃዋሚ ፓርቲ ታዛቢዎችን ማግኘት አዳጋች ነበር፡፡ የፖለቲካ ፓርቲዎቹ በገዥው ፓርቲ ጫና ታዛቢዎቻቸው እንዳልተገኙ ቢገልጹም፣ በአዲስ አበባና በተለያዩ ከተሞች በብዙዎቹ የምርጫ ጣቢያዎች ታዛቢዎች ለማሰማራት አለመቻላቸው እንቆቅልሽ ሆኗል፡፡ በተወሰኑ ሥፍራዎች የተቃዋሚ ፓርቲዎች ተወካዮች በበጀት እጥረት ምክንያት ታዛቢ ማሰማራት አለመቻላቸውን በግልጽ ሲናገሩም ተደምጧል፡፡ በአዲስ አበባ የፖለቲካ ፓርቲዎቹ ታዛቢ አለማስቀመጣቸው የገረማቸው ብዙ ሰዎች፣ ራቅ ወዳሉ አካባቢዎች እንዴት ሊያሰማሩ ይችላሉ ብለው ትዝብታቸውን ገልጸዋል፡፡ ብዙዎቹ የፖለቲካ ፓርቲዎች ታዛቢ ላለማሰማራታቸው ምክንያቱ የገዥው ፓርቲ አፈናና ጫና ከመጠን በላይ በመሆኑ ነው ቢሉም፣ በሁሉም ሥፍራዎች የሚገኙ የምርጫ አስፈጻሚዎች ግን አስተባብለዋል፡፡ በበርካታ ቦታዎች የተቃዋሚ ፓርቲዎች ፖስተሮችና ባነሮችም አልታዩም፡፡ ከገዥው ፓርቲ ጋር ሲነፃፀሩ ተቃዋሚ ፓርቲዎች ለምርጫው ዝግጅት ያደረጉም አይመስሉም፡፡ ሪፖርተር በአዲስ አበባና በተለያዩ የክልል ከተሞች በመሰማራት የተዘጋጁ የተለያዩ የምርጫ ዘገባዎች በውስጥ ገጾች ሠፍረዋል፡

‹‹ማማ በሰማይ››፡- የፍቅር፣ የነጻነት ተጋድሎ እና የእምነት ቃል ሕያው ኑዛዜ

በፍቅር

‹‹እናት ኢትዮጵያ ገዳይና ሟች የሆኑትን፣ እነዛ ፍጻሜያቸው እንዲያ የከፋውን የልጆቿን መሥዋዕትነታቸውንና ታላቅ ርእያቸውን በሚያነቡ ዓይኖች ምንጊዜም ስታስታውስ፤ የፈጸሙትን ስሕተት ደግሞ በይቅር ባይነት ትዘክረዋለች፡፡››

‹‹ታወር ኢን ዘ ስካይ/ማማ በሰማይ›› -በሕይወት ተፈራ

በበርካታ አንባቢዎች ዘንድ ልዩ አድናቆትን ያተረፈውን፣ የአዲስ አበባ ዩኒቨርሲቲ ተማሪዋና የኢሕአፓ ታጋይ በነበረችው በሕይወት ተፈራ ‹‹ታወር ኢን ዘ ስካይ›› በሚል በእንግሊዝኛ ቋንቋ የተጻፈውንና በቅርቡም በጌታነህ አንተነህ ‹‹ማማ በሰማይ ›› በሚል ርእስ የተተረጎመውን መጽሐፍ ከሰሞኑ በአንድ ባልጠበኩት አጋጣሚ በእጄ ገባ፡፡ ይህን ብዙ የተባለለትን፣ በጣሙን የጓጓኹለትን የሕይወት ተፈራን መጽሐፍ በጉጉትና አንዳንች የቁጭት ስሜት ነበር አንብቤ የጨርስኩት፡፡Book Review: Tower in the Sky

መጽሐፉ በወቅቱ አገሪቱ በአስፈሪ ኹኔታ የተጋፈጠችውን ፖለቲካዊ፣ ኢኮኖሚያዊ፣ ማኅበራዊ ለውጦችንና ሒደቶችን ጉልህ ምሥልን ከሳች፣ በእጅጉ ስሜትን የሚገዛና መንፈስን የሚያሸፍት ሆኖ ነው ያገኘሁት፡፡ ፍቅርና ቃል ኪዳን፣ እምነትና ተስፋ፣ መሥዋዕትነትና ጀብደኝነት፣ ትዕግሥትና ጽናት፣ ብሶትና ቁጭት፣ ለአገርና ለወገን ነጻነትና ክብር፣ ፍትሕና መብት ሲባል የተከፈለን ግዙፉን መሥዋዕትነት አጉልቶና አቅርቦ የሚያሣይ ነው፡፡ ተወደድም ተጠላም ደግሞ ያ ፋኖ ትውልድ ለአገሩና ለወገኑ የከፈለው የእንባ፣ የላብና የደም ግብር የታሪካችን አንድ ግዙፍ አካል ኾኗል፡፡

ሕይወት በመጽሐፏ በኀዘን የተሰበረ ልቧንና በደዌ የደቀቀ አካሏን በፍቅር ዘይት አልስልሶና አክሞ፣ በትሑት ነፍሱና በብሩሕ አእምሮው የማረካትን፣ የሰው ልጆችን የአበሳ፣ የሠቆቃ ታሪክና ለለውጥ የተደረገ የሞት ሽረት ትግልን ከወቅቱ ርእዮት ዓለም ጋርና ከኢትዮጵያ ነባራዊ እውነታ ጋር አዛምዳ በጽሞና ታይ ዘንድ ዓይኖቿን የከፈተላትን፣ በአገሪቱ በሚያስፈራ ኹኔታ እየተምዘገዘገ በነበረው የለውጥ ባቡር ላይ ተሳፍራ የዛ ፋኖ ትውልድ የግዙፍ ታሪኩ ባለቤት፣ ደግሞም በአገሪቱ እየነደደ፣ እየተንቀለቀለ ከነበረው የለውጥ እሳት ጋርም ቀድማ በድፍረት እንድትጋፈጥ ወኔና ብርታት የሆናትን፣ የፍቅር ጓደኛዋን፣ የትግል አጋርዋን፣ ያለ ጊዜው የተቀጠፈውን ጀግናዋን ጌታቸው ማሩንና ያን ፋኖ ትውልድ የዘከረችበት ድርሰቷ- ፍቅርን፣ መሥዋዕትነትን፣ የቃልን ክቡርነት፣ የእምነትን ጽናት ያውጃል፤ ደግሞም ብርቱ ኀዘንን፣ ቁጭትን፣ ብሶትን፣ መቆርቆርን፣ ግን ለምን?! በሚል ድብልቅልቅ ያለ ስሜትን ያጭራል፡፡

ሕይወት ‹‹ያለ ምንም ደም ኢትዮጵያ ትቅደም!›› በሚል መፈክር አሐዱ ያለው፣ ያቀጣጠሉት አብዮት በሒደት ወደ ፃእረ ሞትነት ተቀይሮ፣ ‹‹አብዮት የገዛ ልጆቿን ትበላለች!›› በሚል በደም በተመረቀ፣ በደም በተፈጸመ የአብዮቱ አሳዛኝ ሂደቱንና ዘግናኝ ፍጻሜውን ተርካልናለች፡፡ ብሶትና ምሬት ውስጥ ውስጡን እየበላው፣ ግን ለምን በሚል እንቆቅልሽ ነፍሱ ለተመረረችበት ለእኔና ለትውልዴ፣ ዛሬም መደማመጥ፣ መነጋገርን ብሎ ነገር ኮሶን የመጠጣት ያህል ለሚያንገሸግሸውና በጥላቻ ፖለቲካ ውርዴ ውስጥ ገብቶ ለሚዳክረው የአገራችን ብኩን የፖለቲካ ጉዞ በዚህ ድንቅ በሆነ መጽሐፏ ታጋይዋ- ፍቅርንና መሥዋዕትነትን፣ እውነትንና ፍትሕን፣ ነጻነትንና እኩልነትን፣ ይቅርታን ምሕረትን አውጃለች፡፡

ሕይወት ተፈራ ‹‹ታወር ኢን ዘ ስካይ›› መጽሐፏን በተመረቀበት ዕለት በአዲስ አበባ ዩኒቨርሲቲ በዶ/ር እሸቱ ጮሌ መታሰቢያ ሕንፃ ባደረገችው ንግግሯም፡- ‹‹… የታሪክ እስረኞች በመሆን ያለንበት ቆመን ያለፈውን እያወደስን ወይም ደግሞ እያወገዝን ብቻ ልንኖርም አንችልም፡፡ ያለን ምርጫ አንድ ነው፡፡ እሱም ካለፈው በመማር፣ በመተሳሰብ፣ በተከፈተ አእምሮና መከባበር ላይ የተመሠረተ ውይይት በማድረግ፣ ችግር አፈታት ጥብብ ራሳችንና ሌሎችን በማስተማር ችግራችንን እየፈታን አንድ ሆነን አገራችን ኢትዮጵያ ለሕዝቦቿ የተሻለ ቦታ መሆን እንድትችል ማድረግ ብቻ ነው!›› እንድትል፡፡

አነሳሴ የሕይወት ተፈራን መጽሐፉን ለማሐየስ ወይም ሙያዊ ግምገማ ለማድረግ አይደለም፡፡ ግና የምንጊዜም ባለዕዳው ለሆንለት የዛ ቆራጥና ፋኖ ትውልድ አባል የሆነችው ሕይወት ተፈራ ‹‹ማማ በሰማይ›› መጽሐፍ በውስጤ የጫረብኝን ስሜቴን ለማካፈል ስል ነው ብዕሬን ያነሣኹት፡፡ ከዛ በፊት ግን ይህ የሕይወት ተፈራ መጽሐፍ በእጄ ገብቶ እንዳነበው የሆነበትን አጋጣሚዬን በአጭሩ ልተርክ፡፡

በቅርቡ በአንድ የሥራ አጋጣሚ በ60ዎቹ መጨረሻ ገደማ ከሚገኙ አዛውንት ጋር ተገናኝተን ነበር፡፡ ከእኚህ አባት ጋር ወደ ቢሮአችን የመጡበትን ጉዳያቸውን ተነጋግረን በቀጠሮ ተለያየን፡፡ በሳምንቱ ስንገናኝ ጉዳያቸውን መፍትሔ እንዲሰጠው ወደሚመለከተው ክፍል መመራቱን ነገርኳቸው፡፡ በዚህም አመስግነውኝ በራሳቸው ዙርያ አንዳንድ ጉዳዮችን እያነሳን መጫወት ጀመርን፡፡ እኚህ አዛውንት አባትም በሕይወት ዘመናቸው የኢሕአፓ ታጋይ፣ መምህር፣ የግብርና ኢንቨስተር እንዲሁም በኋለኛው ዕድሜያቸው ዘመን ደግሞ አክቲቪስትና ‹‹ፍሪ ላንስ›› ጋዜጠኛ ሆነው መሥራታቸውንና በአሁንም ሰዓት ደግሞ የሕይወት ታሪካቸውን የሚተርክ መጽሐፍ እያጻፉ እንዳሉ አወጉኝ፡፡

በጨዋታችን መካከል በተለይም ደግሞ ስለ 60ዎቹ ትውልድ ፖለቲካዊ ንቃተ ሕሊና፣ የትግል ሕይወት፣ ለአገሩና ለወገኑ ስለ ነበረው ርእዩ፣ ተስፋውና ምኞቱ ተጨዋወትን፡፡ እኔም በዛ ትውልድ መካከል ለአገራቸውና ለወገናቸው ብሩሕ ተስፋን ሰንቀው የተነሡ ግና እንደ አጥቢያ ኮከብ ብልጭ ብለው ስለጠፉት ስለ እነ ጥላሁን ግዛው፣ ጌታቸው ማሩ፣ ዶ/ር ንግሥት አዳነ፣ ዋለልኝ መኮንን፣ ዶ/ር ተስፋዬ ደበሳይ፣ አዜብ፣ ማርታ መብራህቱ፣ ብርሃነ መስቀል ረዳ፣ ዶ/ር ከድር መሐመድ፣ ዶ/ር አጥናፍ ይማም፣ ወጣቱ መለስ ተክሌ ወዘተ… እያነሣሁ የዛን ፋኖ ትውልድ ቁርጠኝነትና ወኔ፣ ለአገሩና ለሕዝቡ ስለነበረው ፍቅርና መቆርቆርና ስለአሳዛኙ ፍፃሜው ስሜቴንና ቁጭቴን ላጋራቸው ሞከርኩ፡፡

በነገራችን ላይ መለስ ተክሌ በአዲስ አበባ ዩኒቨርስቲ ተማሪ የነበረና በተማሪዎች እንቅስቃሴ ውስጥ ንቁ ተሳትፎ የነበረው ወጣት ነበር፡፡ መለስ ከተደጋጋሚ እስራትና ማስፈራራት በኋላ በመጨረሻ ከለሌሎች ተማሪዎች ጋር ተይዞ በግፍ እንዲረሸን ተደርጓል፡፡ በዚህ ታጋይ ተማሪ ሞትም ብዙዎች የአዲስ አበባ ዩኒቨርስቲ ተማሪዎችና የትግል አጋሮቹ ጥልቅ ኀዘን ነበር የተሰማቸው፡፡ የዛን ጊዜ አዲስ አበባ ዩኒቨርሲቲ ተማሪና የትግሉ አጋር የነበሩት የቀድሞው ጠቅላይ ሚ/ር አቶ መለስ ዜናዊ፣ ለገሰ የሚለውን ስማቸውን ቀይረው በዚህ ወጣት ታጋይ ተማሪ ስም መጠራት የወደዱትም የዚህን ቆራጥ ተማሪ የመለስ ተክሌን የትግል መንፈስና ወኔ ሁሌም ሕያው መሆኑን ለማዘከር ነበር፡፡

ወደቀደመው ነገር ስንመለስም አዛውንቱ የእርሳቸውንና የትውልዳቸውን ታሪክ እንዲህ ባገኘው አጋጣሚ የሚዘክር እንደ እኔ ያለ ዘመነኛ ወጣት በዛ ቢሮ ውስጥ ማግኘታቸው ትልቅ ግርምትን እንደፈጠረባቸው ፊታቸው ላይ በጉልህ አነበብኩት፡፡ አስተያየታቸው የእኔና የትውልዴን ራእይ፣ ተስፋ፣ ምኞት፣ ብሶት፣ ልማቱን፣ ጥፋቱንና ውድቀቱን … ወዘተ የሚጋራ ትውልድ አለ ማለት ነው በሚል አስተያየት ነው ግንባራቸውን ፈታ ቋጠር እያደረጉ በአድናቆትና በግርምት አስተዋሉኝ፡፡ ኀዘንና አንዳንች ተስፋ የተቀላቀለበት በሚመስል ድምፀት አዛውንቱ አባት እንዲህ አሉኝ፡፡ ታሪክ አፍቃሪና አንባቢ ትመስላለህ፡፡ መልካም የኾነ ወዳጅነት ሳንመሰርት እንቀርም፡፡ ይስማማህ ይኾን ልጄ?!

አየህ ልጄ የእኔ ትውልድ ከነልማቱና ጥፋቱም ቢሆን ለአገሩና ለወገኑ የነበረው ፍቅርና መቆርቆር በቃላት ሊገለጽ የማይችል፣ ራሱን ላመነበት ዓላማ ነፍሱን ሳይቀር የገበረ ጀግና ትውልድ ነው፡፡ እናም ታሪኩ፣ ገድሉ ሊነገርለት፣ ሊወሳ ይገባዋል፡፡ አስከትለውም እንግዳዬ አዛውንት እየጻፉ ያሉት መጽሐፍ በማረም፣ አስተያየትና የአሳብ ድጋፍ እንዳደረግላቸው ቃል አስገብተውኝ ተለያየን፡፡ በሌላ ቀን ስልክ ደውለውልኝ ቢሮዬ ድረስ በመምጣት የሕይወት ተፈራን ‹‹ታወር ኢን ዘ ስካይ›› የሚለውንና በቅርቡ ‹‹ማማ በሰማይ›› በሚል ርእስ በጌታነህ አንተነህ የተተረጎመውን መጽሐፍ በስጦታ ይዘውልኝ መጡ፡፡ ከመቀመጫዬ ተነስቼ ከአክብሮትና ከምስጋና ጋር ስጦታቸውን ተቀብልኳቸው፡፡

እንግዲህ እንዲህ በመሰለ ባልጠበኩት አጋጣሚ ነበር የሕይወት ተፈራ ድንቅ መጽሐፍ በእጄ የገባው፡፡ በወቅቱ የአዲስ አበባ ዩኒቨርሲቲ ፕሬስ አሳትሞ በተመጣጣኝ ዋጋ ለገበያ እስኪያቀርበው ድረስ በእርግጥ መጽሐፉን በገበያ ላይ ለማግኘት እጅግ አስቸጋሪና ቢገኝም ዋጋው የሚቀመስ አልነበርም፡፡

‹‹ታወር ኢን ዘ ስካይ›› ከዋጋ ንረቱና ከገበያ ከመጥፋቱ ጋር ተያይዞ የአደሲ አበባ ዩኒቨርሲቲ ፕሬስ በተቻለ ፍጥነት መጽሐፉ በተመጣጣኝ ዋጋ ለአንባብያን ይድረስ ዘንድ የወሰደው ዕርምጃ ደስ የሚያሰኝ ነበር፡፡ ይኸው አሁን ደግሞ ከኹለት ዓመት በዚህ ዓመት በኋላም ‹‹ታወር ኢን ዘ ስካይ›› በሚል ርእስ የተጻፈው መጽሐፍ‹‹ማማ በሰማይ›› በሚል በአማርኛ ቋንቋ ተተርጉሞ ለንባብ በቅቷል፡፡

ሕይወት ተፈራ በመጽሐፏ ውስጥ ውስጣቸው በቁጭት እየነደደ፣ በድኅነት አረንቋ ውስት ገብቶ ለሚማቅቀው፣ የጭቆና ቀምብር ተጭኖት ጀርባው ለጎበጠ ወገናቸው ነፍሳቸውን እንኳን ሳይቀር ለመስጠት ወደኋላ ያላለ ያ ትውልድ፣ መነጋገርና መግባባት አቅቶት ፍፃሜው እርስ በርስ በደም መታጠብ የሆነበትን ዘግናኝ እንቆቅልሽ በውብ ቋንቋ፣ ጥልቅ በሆነ የፍቅር፣ የትግል፣ ኀዘንና ቁጭት ስሜት ውስጥ ሆና የእርሷንና ትውልዷን ማስታወሻ አበርክታልናለች፡፡

‹‹ማማ በሰማይ›› ጥላቻ ለገነነበት፣ ጠላትነት ለነገሠበት የአገራችን የፖለቲካ መድረክ፣ የፖለቲካ ፓርቲዎችና መሪዎች እንዲሁም ለእኔና ለትውልዴ አንድ ትልቅ እውነታን ይነግረናል፡፡ ይኸውም የአገራችንን የፖለቲካ ሜዳ ደልዳላ ለማድረግ ሁነኛው መንገድና መፍትሔው ከጥላቻ ጋግርት፣ ከጽንፈኝነት መንፈስ፣ በጠላትነት ከመተያየት ወጥተን በመነጋገር፣ በመወያየት፣ ልዩነቶቻችንን አክብረን መጓዝ አማራጭ የሌለው ጉዳይ መሆኑን፡፡ ፍቅርና ሰላም ለኢትዮጵያችን ይሁን!!

አምስተኛው ዙር የድምጽ ዘረፋ… (ክንፉ አሰፋ)

የ”ምርጫው” ድራማ እየተተወነ ሳለ፤ የቦርዱ ሊቀመንበር ዶ/ር መርጋ በቃና እና ምክትል ሊቀመንበሩ ዶ/ር አዲሱ ገብረእግዚአብሔር ለአቦይ ስብሃት ስልክ ደወሉ።

“ሃሎ?”

“ሃሎ፣ አቦይ ስብሃት ኖት?”

“ነኝ፣ ምን ፈለግክ?”

“ዶ/ር መርጋ በቃና እና ዶ/ር አዲሱ ገብረእግዚአብሔር ነን።”

“ችግር መስማት አልፈልግም። የታዘዛችሁትን አደረጋችሁ?”

“99.8% ህዝብ አልመረጠንም። ግን በታዘዝነው መሰረት ውጤቱን ገልብጠነዋል!”

“0.2% ብቻ ነው የመረጠን ማለት ነው?”

“አዎን ጌታዬ። ሌላ ምን እንታዘዝ?”

“99.8% ህዝብ የስም ዝርዝሩን አንብብልኝ።” አሉ አቦይ ስብሃት እየተባለ ይወራል።

አንድ ወዳጄ ስለ አቦይ ስብሃት የነገረኝ ታወሰኝ። ሰውዬው ከግመል እንኳን የማይሻል እንስሳ ብጤ ነው። ግመል ሳትጠጣ ለቀናት ትሰራለች አቦይ ስብሃት ደግሞ ሳይሰራ ቀኑን ሙሉ ይጠጣል። አብዛኞቹ የህወሃት አባላት እድሜያቸው እንደ አስተሳሰባቸው ስላረጀ ጨዋታቸው ከውሃ ጋር ነው። ከውድ ውሃ ጋር! ድንጋይን ውሀ ያስጮኸዋል!Ethiopian Election

ሜዳው የኢህአዴግ፣ ዳኛው ኢህአዴግ፣ ታዛቢው ኢህአዴግ፣ ድምጽ ቆጣሪው ኢህአዴግ እንዲሆን ተደርጎ የተዘጋጀው “ምርጫ” እነሆ ተጠናቀቀ። በአፈና የታጀበው ምርጫ ጸጥ-እረጭ ባለ ድባብ ተጠናቅቋል። ልክ አስገድደው እንደሚደፍሩ ወሮበሎች፤ በሃይል ጠልፈው ያላቻ ትዳር እንደሚመሰርቱ ጉልበተኞች፣ የኢትዮጵያ ሕዝብ ያለፍቃዱ እንደገና የአምስት አመት የትዳር ቁርኝት ውስጥ ገብቷል። ሌላ አምስት አመት። ሌላ የህወሀት ዘመን። ሌላ የጥርነፋ ዘመን! ሌላ የቁምራ ዘመን! ሌላ የመፈናቀል ዘመን! ሌላ የመሬት ነጠቃ ዘመን! ሌላ የስደት ዘመን!…

የህወሃት ሰዎች አሁን የጭንቀቱ ምእራፍ ሁለት ላይ ናቸው። በዛሬው እና በትላንቱ እለት የህወሃት ባለስልጣናት ተሰባስበው በፐርሰንቱ ምደባ ላይ ውይይት ይዘዋል። ዘረፋው ላይ ሁሉም በ 100% ይስማማሉ። ምደባው ላይ ግን ችግር አለ። አንዳንዶቹ ይህ ጉዳይ ተአማኝነት እንዲኖረው ለተቃዋሚዎቹ ትንሽ መልቀቅ ይኖርብናል ሲሉ ለሎች ደግሞ ይህንን ሃሳብ ይቃወማሉ። ጥቂት ተቃዋሚዎችን ፓርላማ እንዲገቡ መፍቀድ አለብን የሚሉ ተከራካሪዎች “ሌባ ከሰረቀው ጥቂቱን ቢሰጥ” እንደማይጎዳው ይናገራሉ። ይህንን የማይቀበሉት ግን የተቃዋሚዎች በፓርላማ መግባት ራስ ምታት እንደሚሆንባቸው በስፋት መክረዋል። 547 መቀመጫ የነበረው የቀድሞው ፓርላማ ውስጥ እውነትን የያዘ አንድ ተቃዋሚ ብቻ ጭንቅላታቸውን በጥብጦት እንደነበር ሁሉም አይዘነጉትም። ይህንን በድጋሚ መፍቀድ አልያም ውግዘቱን በመቀበል መሃል ባለ አጣብቂኝ ውስጥ ከርመዋል። ውጤቱን ከሰሞኑ ይፋ ያደርገዋል ዶ/ር መርጋ።

የዘንድሮው ዝርፍያ ጤናማ አይደለም። ልክ እንደ ቦራት ዘ-ዲክታተር ፊልም ተወዳዳሪዎችን እግር እግራቸውን እየመቱ ለብቻ ሮጦ፤ በራስ ዳኛ የድል ዋንጫ መረከብ? ይህ በእውነት በዚህ በ21ኛው ዘመን እጅግ የሚያሳፍር ተግባር ነው። ተቃዋሚ ሃይሎች በምርጫው ክርክር እና በትውልድ ስፍራቸው ላይ የነበራቸው የሕዝብ ድጋፍ ምን ያህል እንደሆነ በግልጽ በታየበት ሁኔታ ህወሃቶች 100% አሸንፈናል ሲሉ ከሌብነታቸው ይልቅ ንቀታቸው ጥርስ የሚያስነክስ መሆኑን ለአፍታ እንኳ አላስተዋሉትም። እጅግ ትንሽ ጭል ብላ የነበረችውን ዲሞክራሲ በምድረ ኢትዮጵያ ገድለው፣ ከፍነው ቀበሩት። አዲዮስ ዲሞክራሲ…

ፈረንጆች የሚሉት አባባል አለ። “ለነብሰ-ገዳዮች ትክክለኛ ዲሞክራሲ ማለት ፍጹም አንባገነን መሆን ነው።”

“በ100% ድምጽ ተመርጠናል!” አሉ። የመረጣቸው ህዝብ የቱ ይሆን? በአዲስ አበባ በነቂስ ወጥቶ “ወያኔ በቃን! መንግስቱ ይግደለን” ያለው ህዝብ ነው ወይንስ ለም መሬቱን ተነጥቆ ለባእድ የተሰጠበት የገጠር ህዝብ? በጋምቤላ፣ በቤንሻንጉል፣ በሁመራ…ወዘተ የተፈናቀለው ህዝብ ነው የመረጣቸው? ወይንስ አምቦ – ጉደርን እንደ ሱናሚ ያጥለቀለቀው ህዝብ ? የቱ ነው ወያኔን የመረጠው? ከስርአቱ ጋር ሆድና ጀርባ የሆነው ሙስሊሙ እምነት ተከታይ ነው ወይንስ በእምነቱ ጣልቃ እየገቡ ካድሬ ጳጳስ የሚሾሙለት ክርስቲያኑ ህብረተሰብ? ማን ነው ህወሃትን የመረጠው? እንደ ምጽዓት ለስደት እያኮበኮበ ያለው ስራ-አጥ ወጣት ነው ወይንስ በአነስተኛና ጥቃቅን ተደራጅቶ ድንጋይ የሚፈልጠው ወጣት ምሁር? መብራት እና ውሃ በፈረቃ ያደረጉበት ህዝብ ነው የመረጣቸው?… ለመሆኑ ስንት አመት ነው ህዝቡ ላይ እንዲህ የሚቀልዱት?

እነሱ ልባቸው በትእቢት ስለተወጠረ፤ ሌላው ህዝብ የማይመለከትና የማይሰማ ይመስላቸው ይሆናል። ትእቢት ደግሞ የውድቀት ምልክት ናት። በመጀመርያ የውጭ ታዛቢዎች እንዳይገቡ ተደረገ። ዝም! በምርጫው ወቅት ደግሞ የተቃዋሚ ፓርቲ ታዛቢዎችን አሰሯቸው። አሁንም ዝም ተባለ። ከዚያ ኮሮጆ እየተሞላ ቀረበና በቁም ያሰሯቸው ታዛቢዎችን ምሽት ላይ ፈትተው እንዲፈርሙ አዘዝዋቸው። የተያያዙት አስገድዶ መድፈር ነውና አንዳንዱን አስገድደው በተሰረቀ የድምጽ ሳጥን ላይ አስፈረሟቸው። ምርጫ 2007 በዚህ ሁኔታ “ሰላማዊ፣ ፍትሃዊ፤ ዲሞክራሲያዊና የህዝብ ተዓማኒነትን አግኝቶ” ተጠናቅቋል ሲሉ ፕ/ር መርጋ በቃና አበሰሩ። እኚህ ፕሮፌሰር ግን ህሊና ይኖራቸው ይሆን? ካላቸው በምን ለወጡት? በገንዘብ? ህሊና ስንት ያወጣል?

አለም አቀፍ መገናኛ ብዙሃን ከምርጫው በኋላ ስላለው ነገር ብዙም አላሉም። ማን እንደሚያሸንፍ እና በምን ያህል ድምጽ እንደሚያሸንፍ አስቀድመው ዘግበው ስለነበር ውጤቱን መድገም የፈለጉ አይመስልም። አስቀድሞ ውጤቱ የታወቀበት ምርጫ መሆኑን አለም አቀፍ መገናኛ ብዙሃን ብቻ ሳይሆኑ፣ ራሱ የምርጫው ቦርድ በድረ-ገጹ ላይ በግልጽ አስቀምጦት ነበር። የምርጫው ቦርድ በድረ-ገጹ እንዳስቀመጠው የኢሕአዴግ 501 ተወዳዳሪዎች የተመዘገበለት ሲሆን መድረክ 270፣ የሰማያዊ ፓርቲ 139 እጩዎች ብቻ እንዲኖራቸው ተደረገ። የሰማያዊ ፓርቲ 200 እጩዎች በምርጫ ቦርዱ ተሰርዘውበታል። 108 እጩዎች አስመዝግቦ የነበረው አንድነት ፓርቲም ስልታዊ በሆነ ዘዴ በቦርዱ እንዳይሳተፍ ታግዷል። ይህ እንግዲህ በሎተሪ ሰበብ የተገለሉትን ሳይጨምር ነው።

መቼም ይታገሉታል እንጂ አይታደሉትምና ቀኑ እስኪደርስ የኢትዮጵያ ሕዝብ ባልፈለገው ሊገዛ፤ ባላመነበት ሊዳኝ፣ ባልመረጠው ሊተዳደር ነው። አሁንም ዝምታን መርጧል። ዝምታ ራሱን የቻለ መልስ ነው። በዝምታ የተዋጠች እያንዳንድዋ ሰከንድ ቁርሾ ይዛ ማለፍዋም ግልጽ ነው። ማሰብ ላልተሳነው ሁሉ ዝምታ ያስፈራል። ምጥና ውሃ ሙላት በድንገት እንዲሉ ዝም ያለ ወራጅ ሲወስድ አይታወቅም። ጽዋም ሲሞላ ይፈስሳል…

አለም-አቀፉ ህብረተሰብም ዝርፊያውን ስለለመደው ችላ ብሎታል። የእንግሊዙ “ዘ ጋርዲያን” ጋዜጣ “ምርጫውን ለአብዛኛው ኢትዮጵያዊ እንደ አንድ ክስተትም አይቆጥረውም።” ሲል፣ ሂዉማን ራይትስ ዎች፤ አምነስቲ ኢንተርናሽናል፣ ፍሪደም ሃውስ፣ ሲፒጄ፣ የመሳሰሉት አለም አቀፍ የመብት ተከራካሪ ተቋማት አፈና የሰፈነበት እና ነጻ ሜድያ በሌለበት ሁኔታ የሚካሄደው ይህ ምርጫው ፍሱም ኢ-ፍትሃዊ እንደነ ገልጸዋል። አልጃዚራ፣ ዋሽንግተን ፖስት፣ ኒውዮርክ ታይምስ የመሳሰሉ ታላላቅ ሜድያ ውጤቱ አስቀድሞ የታወቀ ምርጫ ሲሉ ሂደቱን በክፉ ኮንነውል።

ነገሩ ግልጽ ነው። ነጻ ሜድያ በሌለበት፣ ገለልተኛ ታዛቢዎች ባልተፈቀዱበት፣ ነጻ ዳኛ በልተመደበበት ነጻ ምርጫ አይታሰብ። የዘንድሮው ክስተት ህወሃት የዘረፋ ደረጃውን ያወረደበት ምርጫ ነው። ከረቀቀ የዘረፋ ስልት ወደ ግልጽ የውንብድና ተግባር።

የጀርመን ድምጽ እንግሊዝኛው ክፍል ከምርጫው በኋላ ምንጮችን ጠቅሶ ሲዘግብ “ታዛቢዎ የቁም እስር ላይ ስለነበሩ ወደ ውጭ ወጥተው ምርጫውን መታዘብ አልቻሉም” ብሏል። የሰራዊት እና የሚሊሽያ አባላት በየምርጫ ጣብያው እየተገኙ መራጮችን እያስፈራሩ የተካሄደ ምርጫ በአለም ላይ ይህ ብቻ ነው። የምርጫ ዘመቻም በታጠቁ ሃይሎች ወታደራዊ ትእይንት የተካሄደው በኢትዮጵያ ብቻ ነው።

30 አመት ሙሉ ያል ህዝብ ፍቃድ በስልጣን መቆየት ይሰለቻል። እነዚህ ሰዎች የምእተ አመቱን አንድ አራተኛ የሃገሪትዋን ሃብት ብቻ ሳይሆን የህዝብን ድምጽም እየዘረፉ ተቀመጡ። ባለፉት 24 አመታት በአሜሪካ አምስት ግዜ መንግስት ተቀይሯል። በሆላንድ 7 ግዜ መንግስት ወርዶ በህዝብ ድምጽ ሲቀየር አይተናል። አፍሪካዊቷ ጋና አምስት ግዜ ፕሬዝዳንታዊ ምርጫ ፣ ሶስት ግዜ ፓርላሜንታዊ ምርጫ አድርጋለች።… ያልታደልን ወይንም ያልታገልን እኛ ግን ለ30 አመታት በአንድ አንባገነን ተይዘናል።

ህወሃቶች በሩን ሁሉ ዘግተው ህዝቡን ወደማይፈለገው አመጽ እየገፉት ነው። ያልተረዱት ቢኖር አንደኛው በር ሲዘጋ ሌላኛው በር መከፈት መቻሉን ነው። የ90 ሚሊዮን ህዝብን ድምጽ ሰርቀው፣ አንደበቱን ለጉመው ምን ያህል እንደሚዘልቁ የምናየው ይሆናል። መቶ አመት የዘለቀ አንባገነን በታሪክ አልተከሰተም።

ከዚህ ቀደም ባስነበብኳችሁ ቀልድ ጽሁፌን ልቋጭ። አንድ የህንድ ኢንቨስተር አዲስ አበባ ዮሴፍ ቤተ ክርስቲያንን የቀብር ስፍራ አይቶ በሊዝ ሊገዛ ፈለገ። የአዲስ አበባ ባለስልጣናትን ጠርቶ እንዲሸጡለት ጠየቀ። ባለስልጣናቱም መልሰው ሌሎች ቦታዎች ሳያልቁ የቀብር ስፍራ ለግዜው እንደማይሸጡለት ነገሩት። ህንዱ መለሰና መከራቸው። “እኛ አገር ሰው ሲሞት እናቃጥላለን እንጂ አንቀብርም። ለምን ይህን ለም ቦታ ታባክናላችሁ?” አላቸው። ባለስልጣናቱም መለሱ፣ “እኛ አገር ደግሞ ሰውን በቁሙ እንጂ ሲሞት አናቃጥልም!”