በሚሰማው ጉድ ኢትዮጵያውያን እግዚኦ እንበል! (ነፃነት ዘለቀ)

ነፃነት ዘለቀ

በስንቱ አፍረን እንደምንዘልቀው አሁንስ ግራ ገባኝ፡፡ ይሄኮ ከነፍስ ግድያ አይተናነስም፡፡

ዐረቦች እንዲህ ይቀልዱብናል አሉ – ከተጨባጩ እውነት ስንነሳም በጣም ልክ ናቸው፡፡ እየጎመዘዘና እየመረረንም ቢሆን ልንቀበለው ይገባል፡፡

ፈጣሪ ሀበሻን መንገድ ላይ ያገኘዋል፡፡ “አንተ ሀበሻ፣ ምን እንዳደርግልህ ትፈልጋለህ? የፈለግኸውን ጠይቀኝ አደርግልሃለሁ፡፡ ነገር ግን ያን የማደርግልህን ነገር ለጓደኛህ ዕጥፍ አደርግለታለሁ፡፡” ይለዋል፡፡ ሀበሻውም “ላስብበትና ልንገርህ ጌታ ሆይ!” በማለት ለማሰቢያ የሚሆን ፋታ እንዲሰጠው በትህትና ይጠይቀዋል፡፡ ከጥቂት ጊዜ በኋላ ሀበሻው አስቦ አስቦ ሲጨርስ እፈጣሪ ዘንድ ይቀርብና “ጌታየ አንድ ዐይኔን አጥፋልኝ!” ብሎ ይጠይቃል – የጓደኛው ሁለት ዐይን እንዲጠፋና እርሱ ግን በአንድ ዐይኑ ሊኖር፡፡ ይህን ወደ እውነት የቀረበ ተረት በበሬ አስመስለው የሚያወጉትም አሉ፤ አንዱን በሬውን እንዲገድልለት ይጠይቅና የጓደኛውን ሁለት በሬዎች ለማስገደል፡፡

Prof. Haile Larebo

ሀበሾች ስንትና ስንት ደጋግ ማኅበራዊ ዕሤቶች እንዳልነበሩን አሁን አሁን ለይቶልን የምቀኝነት መፍለቂያ ዋሻ መሆናችን በጣም የሚደንቅ ነው፡፡ ምን እንደሚሻለን እግዜር ይወቅልን፡፡ ከፈጣሪው ጋር የታረቀ እውነተኛ የሃይማኖት አባት ቢኖረን ኖሮ የምህላና የእግዚኦታ ዐዋጅ የሚያሳውጅ አደገኛ የቅስፈት ዘመን እንደመጣብን ተረድቶ ሕጻናትና ጥጆች ሳይጠቡ ወደ ላይ እንድንጮህ ያደርግ ነበር፡፡

ይህን ብሶት የምናገረው በሰሞነኛ ጉዳዮች እጅግ ስለተደናገጥኩ ነውና ጥቂት ንጹሓንና መልካም ሰዎችን ይቅርታችሁን እጠይቃለሁ፡፡ በነገራችን ላይ ያ ልቃቂት አፍ አቦይ ስብሃት የሚሉት ሰድቦናል አሉ፡፡ ሲያንሰን ነው፡፡ ይህ አሳዳጊ የበደለውና ጥላቻንና ቂም በቀልን ሲጋት ያደገ ሰውዬ ምን ብሎ እንደሰደበን በቅጡ አልሰማሁትም፡፡ ነገር ግን ምንም ቢለን ምን ከርሱ ዘንድ ጥፋት የለበትም ባይ ነኝ፡፡ የርሱ አንዱን መልክ የያዘ ነው፡፡ ከመነሻው ኢትዮጵያንና ኢትዮጵያውያንን አይወድም ብቻ ሣይሆን ከአጥፊዎቿ ጋር አብሮና ተባብሮ ይህችን ቅድስት ምድር ከነታሪኳ ከምድረ ገጽ ሊያጠፋት ተነስቷል፡፡ ስለዚህ የርሱን መሳደብ ከቁም ነገር ጥፎ መናደድም ሆነ ጊዜ ማባከን ምን ላይ ተቀምጦ ምንትስ ገማኝ እንደማለት ነው፡፡ ይልቁንስ የኛን ጉድ እንፈትሸው፡፡ ከርሱ የበለጥን ተሳዳቢዎችና “ነፍሰ ገዳዮች” በየሀገራ ተደብቀን የምረጨው መርዝ ሀገርን እያባላ ነው፡፡ ይህ ቀን ሲያልፍ ብዙዎቻችን እምን እንደምንገባ ሳስበው ከአሁኑ ይጨንቀኛል፡፡ ክፉ ነገር እስኪያልፍ ማልፋቱ ከፋ እንጂ ይህ የባለጌዎች ቀን ያልፋል፡፡ ሲያልፍ ግን ዝም ብሎ አያልፍም፤ ብዙ አቧራ አስነስቶና የጭቃ ደለልን ጠርጎ ነው፡፡ ያኔ የአሁኑ “እዩኝ እዩኝ”  በያኔው “ደብቁኝ ደብቁኝ” ይተካል፡፡ ያኔ ብዙ ላለማልቀስ የአሁን ሣቅን መቀነስ፡፡ ፍርድ አትቀርም፡፡ ፍርድ ደግሞ ለራስ ነው – የምትሠራት ሁሉ ነፍስ ዘርታ ትጠብቅሃለች፡፡

ሰሞኑን ፕሮፌሰር ኃይሌ ላሬቦን ከሥራ እንዲታገድ ለማድረግ “ኢትዮጵውያን” በልበ ሙሉነት ማለቴ በልበ ድፍንነት ተንቀሳቅሰዋል አሉ፡፡ ምን ዓይነት ጉዶች ነን? በሰው ሀገር ሊያውም የመናገርና ሃሳብን በማንኛውም መንገድ መግለጽ በተግባርም በዐዋጅም በተረጋገጠበት ሀገር የሰው ፍርፋሪ እየበሉ ወገን ላይ እንዲህ መጨከን ምን ይባላል? የስብሃት ስድብ ታዲያ ከዚህ ጋር እንዴት ይወዳደራል? አሁንም ሲያሰን ነው፡፡ እስኪ የኅሊና ጓዳችሁን ክፈቱና አስቡት – አካላዊ ዐይኖቻችሁን ጨፍኑና፡፡ እኔ ስም አጣሁለት፡፡ አንድን ሰው የፈለግኸውን ያህል ብትጠላው በእንጀራው አትመጣበትም፡፡ ከወያኔ በስተቀር እንዲህ ያለ ፍጡር አለ ብዬ አላምንም ነበር፡፡ ወያኔዎች ግን ሲፈጠሩ ጀምሮ ታህተ-ሰብዕ (subhuman) እንደሆኑ ከተግባራቸው ስለተረዳሁ እነሱ ምንም ቢያደርጉ አይገርመኝም፡፡ ዜጎች አማራ በመሆናቸው ብቻ ባልንም ሚስትንም በብጫቂ ወረቀት ከየሚሠሩበት መሥሪያ ቤት በአንድ ጀምበር ያባረሩና እጅግ በርካታ ቤተሰቦችን በርሀብ አለንጋ የገረፉ አሁን ደግሞ ከዚያም በባሰ በአማራ አካባቢዎች በግልጽና በሥውር ብዙኃንን የሚገድሉ መሆናቸውን ለሚገነዘብ ሰው ወያኔን እንኳን ጦም በማሳደር በኦሽትዊዛዊ የጋዝ ቼምበር ዕልቂትም ቅንጣት አይጠረጥረውም – “The Evil that Men Do” የሚል ቆየት ያለ ፊልም አለ – ይህን ፊልም እዩና የወያኔን ዕኩይ ተፈጥሮ ተረዱ፡፡ ከነዚህ “ሰዎች” ብሶ መገኘት ነገን እንድንፈራ ቢያደርገን አይፈረድብንም – ግን መጪውን ጊዜ አንፈራውም፤ ስለምናውቀው፡፡ ሰው ዕድሜ ልኩን አያለቅስማ!

“ወገናችን”ን ከሥራ ለማሳገድ ቆርጦ መነሣት ማለት የሚቀምሰውን እህል ውኃ ማሳጣት ማለት ነው – በዚያውም መግደል፤ ግድያ ደግሞ መሣሪያን አይመርጥም – በጥይት መግደልም በርሀብ መግደልም ያው ነው፡፡ እንዲያውም በጥይት መግደል በርሀብ ከመግደል የበለጠ “ሰብኣዊ” ነው፡፡ “በጊዜ የጮኸ ጅብ አያሳድረኝም” ይላል የሀገሬ ባላገር፡፡ እንደነዚህ ያሉ ማፈሪያ ዜጎች ወደሚቃዡበት የአራት ኪሎ ቤተ መንግሥት ቢገቡ ፊታቸውን የሚያዞሩበትን ሰው በቆንጨራና  በሜጫ አንገቱን እንደማይቆርጡት ምንም ማስተማመኛ የለንም፡፡ የገባንበት አረንቋ የተለዬ ነው፡፡ እነዚያ ተቻችለውና ተስማምተው ይኖሩ የነበሩ ብልኅና አስተዋይ የጥንት ኢትዮጵያውያን ወዴት ሄዱ ግን? እነምኖች ነን በነሱ ቦታ የተተካነው?

ይህ ዓይነቱ አሣፋሪ ዘመቻ ደግሞ በአንድ ሰው ላይ ብቻ የተወሰነ አይደለም፡፡ አንድ ኢትዮጵያዊ እውነትም ይናገር ሀሰት ሃሳቡን በሃሳብ መሞገት ሲያቅት ወደዚህ ጫፍ የምንሄድበት አጋጣሚ በተለይ ከቅርብ ዓመታት ወዲህ እየተበራከተ ነው፡፡ ይህ ዓይነቱ ወያኔያዊ ደዌ እየተስፋፋ መጥቷል፡፡ ምናልባትም በተቃውሞው ጎራም ይህ ነገር ሳይለመድ አልቀረም፡፡ የራስን ጉድፍ ሳያጠሩ የሰውን ጉድፍ መናገርና ማውገዝ ደግሞ አሣፋሪ ነው፡፡ መጽፍ ቅዱስ “በራስህ ዐይን ውስጥ ያለን ዕርፍ እሚያህል ጉድፍ ሳታወጣ በሰው ዐይን ውስጥ ያለን ስንጣሪ ጉድፍ ለማውጣት አትሞክር” ይላል፡፡ ችግሩ በስሜት የሚነዳ እንጂ በአስተውሎት የሚራመድ ትውልድ እያጠጠን መምጣታችን ነው፡፡ ራስን መመርመር ቀረ፤ ራስን መመዘን ፋሽኑ አለፈበት፤ ራስን ብፁዕ ሌላውን ኃጥዕ ማድረግ የዘመኑ ፈሊጥ ሆነ፡፡ ምን ይሻለናል?

እኛስ ለምደነዋል፡፡ ፈረንጆቹ ይህን ነገር ሲሰሙ በተፈጥሯችን ምን ያህል ይገረሙ?

ለሰላም ማስጠበቅ ሥራ – ወይ ቀልድ – በሀገሩ ሰላም ያለ ይመስል – የወያኔው መንግሥት ጦር ወደ ላይቤሪያ ሄደ አሉ – ቀደም ሲል ነው፡፡ ከሌሎች የአፍሪካ ሀገራትም እንዲሁ ጦር ተልኮ ነበርና በአንድ ካምፕ ውስጥ ሁሉም ይኖሩ ነበር፡፡ የየሀገሩ የጦር አባላት ካለፈቃድ ከካምፕ እየወጡና ነገር እያበላሹ ስለመጡ ወታደራዊ አዛዦች ተቸገሩ፡፡ ያኔ ከየሀገሩ ጦር አንዳንድ ካቦ ተመርጦ ወገን ወገኑን እንዲቆጣጠር ተወሰነ፡፡ ኢትዮጵያውያን ሊመርጡ ሲሉ አንድ ጠባያችንን ጠንቅቆ የሚያውቅ አንድ የአፍሪካ ጦር አስተባባሪ ኮሚቴ አባል “ኢትዮጵያውያኑን አታስመርጧቸው፤ ምክንያቱም ለነሱ ‹አትውጡ› ማለት ብቻ በቂ ነው፡፡ እርስ በርስ ስለሚመቀኛኙ አንዱ ሲወጣ ሌላው ይጠቁማልና በነሱ ችግር አይግባችሁ፡፡”

እስከመቼ እንዲህ እየተቀለደብን እንኑር? መቼስ ነው የምናድገው? የፈረንጆች መሣቂያና መሣለቂያ እንደሆንን ለመኖር የመረጥነው ምን ዓይነት ብዔልዘቡላዊ ንፋስ በመካከላችን ቢነፍስ ነው? ይህ ባሕርያችን እኮ ነው የሚያስንቀንና ለጠላቶቻችን እንደትልቅ የማጥቂያ ሥልት ሆኖ የሚያገለግለው፡፡ ብዙ ሳይለፉ በቀላሉ የሚያሸንፉን በውስጣችን በተሰገሰገው የምቀኝነት መንፈስ ምክንያት ነው፡፡ በዚህ አስቀያሚ ጉዞ ከቀጠልን መቼም ቢሆን ሀገርና መንግሥት አይኖረንም፡፡ ይህን የምለው ምርጫችን ይህ ሆኖ ከቀረ ለማለት ፈልጌ እንጂ ጉድፋችንን መጥረግ ብንጀምር ፈጣሪ የሚታደገን መሆኑን አጥቼው አይደለም፡፡ “እሹ ታገኛላችሁ፤ አንኳኩ ይከፈትላችኋል” አይደለም እንዴ እርሱ ራሱስ የሚለን? ምን ከማን ለማግኘትና እንዴት ማግኘትም እንደምንችል ካላወቅን ከግብጽ ከነዓን ለመግባት ለ40 ዓመታት በበረሃ እንደተንከራተቱት የጥንት እስራኤላውያን መሆናችን ነው – የሣምንቱን መንገድ፡፡ ስለዚህ የምትፈልገውን አለማወቅም ችግር ነው፡፡

ከቅርብ ዓመታት ወዲህ እንኳን ይህ ከሥራ አባርሩልን የሚሉት ፈሊጥ በስንት ወገኖቻችን ላይ እንደተሞከረ በጸጸት የምናስታውሰው ነው፡፡ እባክህን አንድኛህ አንባቢ ይህን ነገር ከየመዛግብቱ ሰብስብና በማን ላይ ማን ወይም እነማን እንደዘመቱበት አስነብበን፡፡ ሀፍረትና ይሉኝታ እንደሆኑ ከሀገራችን ለይቶላቸው ከኮበለሉ 40 ዓመት አለፋቸው፡፡ “ዘይገርም ሻሸመኔ ትብስ ኮፈኔ” አሉ? ይህ እኮ መቅሰፍት እንጂ ሌላ እንዳይመስላችሁ – ሰዎች እንዴት ቢያስቡ ነው – ምን ዓይነትስ አንጎል ቢኖራቸው ነው – ወደዚህን መሰል ቅሌት የሚወርዱት? “እገሌን ከሥራ አስወጡልን!” ብሎ ደጅ ጥናትና አቤቱታ? በሌሎች ሀገሮች ይህን ዓይነት ብልግና የሚታወቅ አይመስለኝም፡፡

ምቀኝነት እንዲህ ፈሩን ለቅቆ በሰው ሀገር ሣይቀር ኢትዮጵያውያንን አንገታችንን እያስደፋን ነው፡፡ ከዚህ በላይ አሣፋሪ ነገር የለም፡፡ ለራሱ በጥገኝነት እየኖረ ከአደጋ የተጠለለን ሰው ጉሮሮውን አንቃችሁ ግደሉልን ከማለት የበለጠ ፋሽዝምና ናዚዝም ወይም ወያኔነት የለም፡፡ ይሄ አካሄድ በቀላሉ ፀረ-ዴሞክራሲ ነው ተብሎ ብቻ የሚታለፍ አይደለም፤ በሰው ሀገር እንዲህ ያደረገ ሰው ነገ ሥልጣን ቢይዝ ከፍ ሲል ለመጥቀስ እንደሞከርኩት የፀሐይ ብርሃንንና አየርን ሣይቀር  ለየነገድና ጎሣው በራሽን መልክ እንደሚያድል ጥርጥር የለውም – የኔ ነው ለሚለው ጎሣ የአንበሣ ድርሻውን እየሰጠ፡፡ ከዚህ አኳያ ወያኔን የሚመርጥ ሰው ቢኖር በበኩሌ አልፈርድበትም፡፡ ሰው እንዲህ እየደደበ የሚሄድበት ምክንያት ደግሞ በጭራሽ አይገባኝም፡፡ በስማም….

– See more at: http://ecadforum.com/Amharic/archives/17414/#sthash.KoxHFsiK.dpuf

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s